Hamza Zahoor: भारताविरुद्ध मैदानात उतरला, मनाशी एकच जिद्द ठेवली! हमजा जहूरने पाकिस्तानला विजय मिळवून दिल्यानंतर काय सांगितलं?
Hamza Zahoor Statement: भारताच्या हातातून विजय हिसकावला. नाबाद शतक झळकावलं, असं म्हणत हमजा जहूरने मनातली गोष्ट सांगितली आहे.
रविवारी झालेल्या एसीसी अंडर-19 वन डे एशिया कप 2026 च्या ‘अ’ गटातील सामन्यात अर्जुन राजपूतच्या शानदार शतकावर हमजा झहूरच्या नाबाद शतकाने मात केली. ज्यामुळे पाकिस्तानने भारतावर तीन गडी राखून विजय मिळवला. प्रथम फलंदाजी करताना भारताने 208 धावा केल्या. प्रत्युत्तरात पाकिस्तानने 61 धावांत पाच गडी गमावले, परंतु हमजा झहूरने हसनेन दार (38) सोबत सहाव्या विकेटसाठी 107 धावांची महत्त्वपूर्ण भागीदारी करून विजय निश्चित केला. हमजाने 108 चेंडूंमध्ये नाबाद 100 धावा करून संघाला 11 चेंडू शिल्लक असताना लक्ष्यापर्यंत पोहोचवले. यानंतर हमजाने प्रतिक्रिया दिली आहे.
या विजयामुळे पाकिस्तान दोन सामन्यांतून चार गुणांसह ‘अ’ गटाच्या गुणतालिकेत अव्वल स्थानी पोहोचला आहे. भारत दोन गुणांसह दुसऱ्या स्थानावर आहे. भारताची डावखुरी फिरकी गोलंदाज मनाल चौहानने 13व्या आणि 15व्या षटकात सलग दोन धक्के देत पाकिस्तानला 61 धावांवर पाच गडी गमावून कठीण परिस्थितीत टाकले होते. त्याने अब्दुल कादिरला ज्या चेंडूवर बाद केले तो कौतुकास्पद होता. चेंडू फलंदाजाच्या बॅटची बाहेरील कड चुकवून ऑफ-स्टंपला लागला.
त्यानंतर हमजा जहूर आणि हसनेन दार (38) यांनी सूत्रे हाती घेतली. त्यांनी संयमाने भारतीय गोलंदाजांचा सामना केला. या भागीदारीत हमजा सर्वात प्रभावी ठरला, त्याने आपल्या लांब हातांचा फायदा घेत आकर्षक फटके मारले. त्याने भारतीय वेगवान गोलंदाजांविरुद्ध सहजतेने स्वीप शॉट्स खेळले आणि संधी मिळताच जबाबदारीही स्वीकारली. सामनावीर ठरलेल्या हमजाने आपल्या खेळीत 10 चौकार आणि तीन षटकार ठोकले.
वेगवान गोलंदाज इशान सूदच्या गोलंदाजीवर त्याने मिडविकेटवरून मारलेला षटकार शानदार होता. त्याने फिरकी गोलंदाज मनाल चौहान, यशवीर गौर आणि अर्जुन राजपूत यांच्याविरुद्ध थर्ड मॅनच्या दिशेने अप्रतिम फटके मारून चौकारही ठोकले. 168 धावांवर दार बाद झाल्यानंतर पाकिस्तानला विजयासाठी आणखी 41 धावांची गरज होती. हमजा एका टोकावर खंबीरपणे उभा राहिला आणि आपल्या संघाला विजय मिळवून दिल्यानंतरच तो परतला. त्याने काव्य पटेलच्या गोलंदाजीवर कव्हर ड्राईव्ह मारून विजयी धाव पूर्ण केली आणि त्याच फटक्याने आपले शतकही पूर्ण केले.
सामन्यानंतर हमजा म्हणाला, मला भारताविरुद्ध शेवटपर्यंत क्रीजवर टिकून राहायचे होते. मला खात्री होती की मी माझ्या देशासाठी सामना जिंकू शकेन. विकेट पडल्यावर काही दडपण आले का, असे विचारल्यावर तो म्हणाला, नाही, फारसे दडपण नव्हते. मी माझा खेळ खेळण्याचा आनंद घेत होतो. मजा करत होतो. पाकिस्तानचा कर्णधार फरहान युसूफनेही हमजाचे कौतुक करत म्हटले, हमजाच्या कामगिरीचे मला आश्चर्य वाटले नाही कारण मला त्याची क्षमता माहीत आहे.
