क्रीजमध्ये पोहोचली होती हेटमायरची बॅट, तरी दिला रनआउट; नंतर अंपायरशी वाद अन्… नेमकं काय घडलं?

भारताविरुद्धच्या पहिल्या टी-२० सामन्यात वेस्ट इंडिजचा फलंदाज शिमरॉन हेटमायर खूपच दुर्दैवी ठरला. एकाना स्टेडियमवर तिसऱ्या क्रमांकावर फलंदाजीला आलेल्या हेटमायरने आपल्या पहिल्याच चेंडूवर चौकार मारला. मात्र क्षेत्ररक्षणातील चुकीमुळे तो धावबाद झाला. सहाव्या षटकात शाई होपने समोर उभ्या असलेल्या अक्षर पटेलच्या एका आखूड चेंडूवर फटका मारला.

अक्षरने झेप घेतली, पण चेंडू त्याच्या हातातून निसटला. त्यानंतर होप आणि शिमरॉन हेटमायर धाव घेण्यासाठी धावले. कव्हरला क्षेत्ररक्षण करत असलेला श्रेयस अय्यर धावत आला. त्याने चेंडू फलंदाजी करणाऱ्या खेळाडूच्या दिशेने फेकला. संजू सॅमसनने चेंडू पकडला आणि विकेट घेतली. पहिल्यांदा पाहिल्यावर असे वाटले की शिमरॉन हेटमायर क्रीजमध्ये आला आहे. भारतीय क्षेत्ररक्षकांनी जोरदार अपील केली नाही, पण स्क्वेअर लेग पंचांनी तिसऱ्या पंचांना इशारा दिला.

रिप्लेमध्ये शिमरॉन हेटमायरची बॅट हवेत असल्याचे दिसले. वेगवेगळ्या कोनांतील रिप्ले तपासल्यानंतर, तिसऱ्या पंचांनी हेटमायरला बाद घोषित केले. शिमरॉन हेटमायरने झेप घेतल्यानंतर त्याची बॅट क्रीझच्या आत जमिनीला स्पर्शली नाही. त्यामुळेच त्याला बाद घोषित करण्यात आले. तिसऱ्या पंचांच्या निर्णयाने हेटमायरला धक्का बसला. तो मैदानातील पंचांशी वाद घालू लागला. वेस्ट इंडिजचा कर्णधार शाई होपसुद्धा पंचांशी बोलताना दिसला. त्यानंतर पंचांनी स्पष्ट केले की, जेव्हा संजू सॅमसनने बेल्स काढल्या, तेव्हा त्याची बॅट हवेत होती.

आयसीसी नियम ३०.१.१ नुसार, जोपर्यंत फलंदाजाच्या शरीराचा किंवा बॅटचा कोणताही भाग पॉपिंग क्रीजच्या मागे जमिनीला स्पर्श करत नाही, तोपर्यंत तो क्रीझबाहेर मानला जातो. जर बॅट क्रीज लाईनच्या वर हवेत असेल आणि त्याचे पायही हवेत असतील, तर फलंदाज क्रीझबाहेर असतो. जर त्यावेळी बेल्स उडाल्या, तर फलंदाज बाद होऊ शकतो. अक्षर पटेलच्या षटकात हेटमायर धावबाद झाला आणि त्याच षटकात त्याने रोव्हमन पॉवेलला त्रिफळाचीत केले. पॉवेल तीन चेंडू खेळून त्रिफळाचीत झाला. अक्षरच्या गोलंदाजीवर मोठा फटका खेळण्याच्या प्रयत्नात त्याने आपली विकेट गमावली. पॉवेलला त्रिफळाचीत केल्यानंतर अक्षरने त्या षटकात एकही धाव दिली नाही. याचा अर्थ त्याचे षटक डबल-विकेट मेडन होते.