T20 World Cup 2026 : 2 दिग्गज खेळाडू T20 वर्ल्डकपमधून बाहेर, मोक्याच्या क्षणी कर्णधार बदलावा लागणार
ICC T20 World Cup 2026 : आयसीसी टी 20 वर्ल्डकप 2026 स्पर्धेच्या सुरुवातीलाच काही संघांना मोठे धक्के बसले आहेत, दोन संघांचे स्टार खेळाडू संपूर्ण स्पर्धेतून बाहेर पडले आहेत. याबाबत सविस्तर माहिती जाणून घेऊयात.
भारत आणि श्रीलंकेत आयसीसी टी 20 वर्ल्डकप 2026 चे आयोजन करण्यात आले आहे. सध्या स्पर्धेत लीग स्टेजचे सामने खेळवले जात आहेत. अशातच आता स्पर्धेच्या सुरुवातीलाच काही संघांना मोठे धक्के बसले आहेत, दोन संघांचे स्टार खेळाडू संपूर्ण स्पर्धेतून बाहेर पडले आहेत. हे दोन्ही खेळाडू क्रिकेट जगतातील सुप्रसिद्ध नावे आहेत, त्यांच्यात एकहाती सामना फिरवण्याची क्षमता आहे, त्यामुळे य दोन्ही संघांना मोठा धक्का बसला आहे. हे खेळाडू कोण आहेत ते सविस्तर जाणून घेऊयात.
झिम्बाब्वेला मोठा धक्का
झिम्बाब्वेने ऑस्ट्रेलियाचा पराभव करत खळबळ उडवून दिली आहे. मात्र या सामन्यापूर्वी झिम्बाब्वेला मोठा धक्का बसला. 40 वर्षीय यष्टीरक्षक-फलंदाज ब्रेंडन टेलर हॅमस्ट्रिंग दुखापतीमुळे स्पर्धेतील उर्वरित सामन्यांमधून बाहेर पडला आहे. ऑस्ट्रेलियाविरुद्धच्या सामन्यापूर्वी झिम्बाब्वेचा कर्णधार सिकंदर रझा याने याबाबत माहिती दिली. टेलरला ओमानविरुद्धच्या सामन्यात ही दुखापत झाली होती, त्यामुळे 30 चेंडूत 31 धावा काढल्यानंतर तो निवृत्त झाला होता. विकेटकीपिंग करताना त्याने तीन झेलही घेतले होते, मात्र आता तो उर्वरित स्पर्धेचा भाग असणार नाही.
बेन करनचा संघात समावेश
ब्रेंडन टेलरच्या जागी आता बेन करनचा संघात आता समावेश करण्यात आला आहे. करनने याआधी कसोटी आणि एकदिवसीय सामने खेळलेले आहेत, मात्र तो पहिल्यांदाच टी-20 आंतरराष्ट्रीय सामने खेळताना दिसणार आहे. तो संघात सामील झाल्यामुळे झिम्बाब्वेच्या फलंदाजीला काही बळकटी मिळणार आहे.
या संघाचा कर्णधार बाहेर पडला
आयर्लंडलाही मोठा धक्का बसला आहे. संघाचा कर्णधार आणि सलामीवीर पॉल स्टर्लिंग गुडघ्याच्या दुखापतीमुळे स्पर्धेतून बाहेर पडला आहे. बुधवारी ऑस्ट्रेलियाविरुद्धच्या सामन्यात या संघाला 67 धावांनी पराभव स्वीकारावा लागला होता, त्याच सामन्यात स्टर्लिंग जखमी झाला होता. क्षेत्ररक्षण करताना कॅच घेताना तो गुडघ्यावर पडला. त्यानंतर फलंदाजी करताना धाव घेताना त्याची दुखापत आणखी वाढली. त्यानंतर स्कॅनमध्ये लिगामेंट फाटल्याचे झाल्याचे दिसून आले. त्यामुळे तो आता उर्वरित स्पर्धेत सहभागी होऊ शकणार नाही.
सॅम टॉपिंगचा संघात समावेश
पॉल स्टर्लिंगच्या जागी अनकॅप्ड युवा फलंदाज सॅम टॉपिंगचा आयर्लंडच्या संघात समावेश करण्यात आला आहे. टॉपिंग हा सलामीवीर फलंदाज आहे. तो पहिल्यांदाच आयर्लंड कडून खेळताना दिसणार आहे. तो आता डावाची सुरुवात करण्याची शक्यता आहे. मात्र संघाला आता नवा कर्णधार शोधावा लागणार आहे.
