AUS vs PAK Test : ऑस्ट्रेलियाचा पाकिस्तानला व्हाईट वॉश, मालिका 3-0 ने जिंकली

मुंबई : ऑस्ट्रेलियाने पाकिस्तानला पुन्हा एकदा धोबीपछाड दिला आहे. गेल्या 17 वर्षापासून पाकिस्तानला एकही कसोटी मालिका जिंकता आलेली नाही. त्याचाच कित्ता यंदाही गिरवला गेला. तीन सामन्यांच्या कसोटी मालिकेत पाकिस्तानने ऑस्ट्रेलियाला 3-0 ने धोबीपछाड दिला. क्रिकेटच्या भाषेत सांगायचं तर व्हाईट वॉश दिला आहे. तिसऱ्या कसोटीच्या पहिल्या डावात पाकिस्तानने चांगली कामगिरी केली होती. पहिल्या दिवशी सर्वबाद 313 धावा केल्या होत्या. त्या प्रत्युत्तरात ऑस्ट्रेलियाला 299 धावा करता आल्या. त्यामुळे पाकिस्तानकडे 14 धावांची आघाडी होती. दुसऱ्या डावात पाकिस्तानच्या फलंदाजांनी माती खाल्ली. पाकिस्तानचा संपूर्ण डाव अवघ्या 115 धावांवर आटोपला आणि विजयासाठी 130 धावांचं आव्हान देण्यात आलं. ऑस्ट्रेलियाने हे आव्हान 2 गडी गमवून पूर्ण केलं. तसेच कसोटी कारकिर्दिच्या अंतिम सामन्यात डेविड वॉर्नरने 57 धावांची खेळी केली. पाकिस्तानकडून साजिद खानला दोन गडी बाद करण्यात यश आलं.

दुसऱ्या डावात ऑस्ट्रेलियाला उस्मान ख्वाजाच्या रुपाने पहिला धक्का बसला. त्याला आपलं खातंही खोलता आलं नाही. साजिद खानने त्याला पायचीत करत तंबूत पाठवलं. त्यानंतर डेविड वॉर्नर आणि मार्नस लाबुशेन या जोडीने 119 धावांची भागीदारी केली. डेविड वॉर्नर 57 धावांवर असताना बाद झाला. त्यानंतर मार्नस लाबुशेन आणि स्टीव्ह स्मिथ जोडीने विजयी धावसंख्या केल्या. ऑस्ट्रेलियाने पाकिस्तानवर 8 गडी राखून विजय मिळवला.

पाकिस्तानला या पराभवामुळे मोठा फटका बसला आहे. ऑस्ट्रेलिया दौऱ्यापूर्वी पाकिस्तान वर्ल्ड टेस्ट चॅम्पियशनशिपच्या गुणतालिकेत पहिल्या स्थानावर होती. पण पराभवामुळे आता सातव्या स्थानावर घसरण झाली आहे. तर ऑस्ट्रेलियाला वर्ल्ड टेस्ट चॅम्पियनशिप गुणतालिकेत फायदा झाला असून अव्वल स्थान गाठलं आहे.

दोन्ही संघांची प्लेइंग इलेव्हन

ऑस्ट्रेलिया (प्लेइंग इलेव्हन): डेव्हिड वॉर्नर, उस्मान ख्वाजा, मार्नस लॅबुशेन, स्टीव्हन स्मिथ, ट्रॅव्हिस हेड, मिचेल मार्श, एलेक्स कॅरी (विकेटकीपर), मिचेल स्टार्क, पॅट कमिन्स (कर्णधार), नाथन लियॉन, जोश हेझलवूड

पाकिस्तान (प्लेइंग इलेव्हन): अब्दुल्ला शफीक, सैम अयुब, शान मसूद (कर्णधार), बाबर आझम, सौद शकील, मोहम्मद रिझवान (विकेटकीपर), आघा सलमान, आमेर जमाल, साजिद खान, हसन अली, मीर हमजा