IND vs SA: David Miller ला धक्का, आवडत्या लिटिल ‘रॉकस्टारचं’ कॅन्सरमुळे निधन
IND vs SA: डेविड मिलरने ज्या लहान मुलीसोबत फोटो पोस्ट केलाय, कोण आहे ती?
मुंबई: भारत दौऱ्यावर आलेल्या दक्षिण आफ्रिकन टीममधील काही खेळाडूंनी शानदार प्रदर्शन केलय. यात स्फोटक फलंदाज डेविड मिलरच नाव आघाडीवर आहे. या डावखुऱ्या फलंदाजाने टी 20 मध्ये दणदणीत शतक ठोकलच. पण लखनौमध्ये झालेल्या पहिल्या वनडे मॅचमध्येही दमदार खेळ दाखवला.
मिलरला बसला धक्का
टीमच्या विजयात त्याने महत्त्वाच योगदान दिलं. मिलरच्या बाबतीत एवढ सगळं चांगलं घडत असताना, एका बातमीमुळे त्याला धक्का बसला आहे. मिलरच्या खूप जवळ असणाऱ्या एका लिटिल रॉकस्टारने जगाचा निरोप घेतलाय.
मिलरच मन मोडलं
डेविड मिलरने शनिवारी 8 ऑक्टोबरला त्याच्या इन्स्टाग्राम अकाऊंटवर एक फोटो आणि व्हिडिओ पोस्ट केलाय. मिलरच्या त्या पोस्टने सर्वांनाच धक्का देत भावूक बनवलं. मिलरने एका लहान मुलीसोबत आपला फोटो पोस्ट केला. कॅन्सरमुळे या मुलीच निधन झालय. ही लहान मुलगी बराच काळ कॅन्सरशी झुंज देत होती. मिलरने या पोस्टच्या माध्यमातून मुलीच्या निधनाची माहिती दिली. त्याने त्या छोट्या मुलीबद्दल वाटणारं प्रेम आणि दु:ख व्यक्त केलं.
मिलरने त्याच्या पोस्टमध्ये काय म्हटलय?
“तुझं मन खूप मोठं होतं. हे मला माहित आहे. तुझी मला भरपूर आठवण येईल. तू तुझी लढाई एका नव्या उंचीवर घेऊन गेलीस. नेहमीच तू सकारात्मक होतीस. चेहऱ्यावर तुझ्या हास्य होतं. तू तुझ्या प्रवासात प्रत्येक व्यक्ती, आव्हानांना आपलस केलस. आयुष्याच्या प्रत्येक क्षणात जगण्याचा आनंद घेतला पाहिजे, हे तू मला शिकवलस” असं डेविड मिलरने त्याच्या पोस्टमध्ये म्हटलं आहे.
कोण आहे ही मुलगी?
डेविड मिलरच्या या पोस्टमुळे अनेकांचा गैरसमज झाला. पण ही डेविड मिलरची मुलगी नाही. ही मुलगी डेविड मिलरची मोठी फॅन होती. अनेकदा ती दक्षिण आफ्रिकेच्या मॅच बघण्यासाठी स्टेडियममध्ये यायची. मिलरही आपल्या या छोट्या फॅनला भेटण्याची एकही संधी सोडायचा नाही. तिच्यासोबत बोलायचा, वेळ घालवायचा. या मुलीला कॅन्सरसारखा दुर्धर आजार होता. तिची या आजारासोबत लढाई सुरु होती.
