Ind vs Pak: आशिया कपमध्ये 6 वर्षानंतर पाकिस्तानने टीम इंडियाचा खेळ बिघडवला
Ind vs Pak: पाकिस्तान टीमकडून अनुभवी ऑलराऊंडर निदा डारने महत्त्वाची भूमिका बजावली.
मुंबई: महिला आशिया कप 2022 मध्ये एका धक्कादायक निकालाची नोंद झाली आहे. हरमनप्रीत कौरच्या नेतृत्वाखाली खेळणाऱ्या टीम इंडियाचा पाकिस्तानने पराभव केला. परंपरागत कट्टर प्रतिस्पर्धी पाकिस्तानने टीम इंडियाला 13 धावांनी हरवलं. पाकिस्तानच्या महिला टीमने 6 वर्षानंतर पहिल्यांदा टीम इंडियावर विजय मिळवला आहे.
बांग्लादेशच्या सिलहटमध्ये शुक्रवारी 7 ऑक्टोबरला हा सामना झाला. पाकिस्तानच्या विजयात अनुभवी ऑलराऊंडर निदा डारने महत्त्वाची भूमिका बजावली.
हे कठीण लक्ष्य नव्हतं, पण….
टुर्नामेंटमध्ये आपला चौथा सामना खेळणाऱ्या भारतीय टीमसमोर विजयासाठी 138 धावांचे लक्ष्य होते. मजबूत बॅटिंग लाइन अप असलेल्या टीम इंडियासाठी हे कठीण लक्ष्य नव्हतं. पाकिस्तानी गोलंदाजांनी हा समज चुकीचा ठरवला. अचूक टप्प्यावर गोलंदाजी करुन टीम इंडियाचा खेळ 124 धावात संपवला.
भारतीय फलंदाज फ्लॉप
टीम इंडियाने खूपच खराब सुरुवात केली. चौथ्याच ओव्हरमध्ये एस मेघनाचा विकेट गमावला. टीम इंडियाला सहाव्या ओव्हरमध्ये मोठा झटका बसला. चांगल्या फॉर्ममध्ये असलेल्या जेमिमा रॉड्रिग्जला फक्त 2 धावांवर निदा डारने बाद केलं. सतत विकेट पडत असल्याने टीम इंडियाला अपेक्षित सुरुवात मिळाली नाही. 10 ओव्हर्समध्ये टीम इंडियाच्या फक्त 50 धावा झाल्या होत्या. याच षटकात स्मृती मांधना आऊट झाली.
निदा डारची जबरदस्त फलंदाजी
भारत-पाकिस्तान सामना म्हटला की, रोमांचक सामन्याची अपेक्षा असते. पण ती अपेक्षा पूर्ण होऊ शकली नाही. या मॅचचा एकतर्फी निकाल लागला. पाकिस्तानच्या निदा डारने दमदार फलंदाजी केली. त्या बळावर पाकिस्तानी टीमने 20 ओव्हर्समध्ये 6 विकेट गमावून 137 धावा केल्या. निदा डारने नाबाद 56 धावा केल्या. गोलंदाजीतही ती प्रभावी ठरली. 4 ओव्हर्समध्ये 23 धावा देऊन तिने 2 विकेट काढल्या.
