IPL 2026 : भुवनेश्वर कुमार Purple Capचा बादशाह, सर्वाधिक धावा कुणाच्या नावावर?
IPL 2026 Orange Cap and Purple Cap Holder Match No 39 : आयपीएल 2026 स्पर्धेचा अर्धा हंगाम संपलाय. त्यामुळे आता प्लेऑफच्या हिशोबाने प्रत्येक सामना हा अटीतटीचा होत चालला आहे. त्यामुळे ऑरेंज आणि पर्पल कॅपसाठीही चुरस पाहायला मिळत आहे.
आयपीएल स्पर्धेच्या 19 व्या मोसमातील 39 व्या सामन्यात दिल्ली कॅपिट्ल्स विरुद्ध रॉयल चॅलेंजर्स बंगळुरु आमनेसामने होते. आरसीबीने दिल्लीच्या होम ग्राउंडमध्ये अर्थात अरुण जेटली स्टेडियममध्ये स्पर्धेच्या इतिहासातील चेंडूबाबत दुसरा सर्वात मोठा विजय मिळवला. आरसीबीने 76 धावांचं आव्हान हे 81 बॉलआधी पूर्ण केलं. आरसीबीने अशाप्रकारे या हंगामातील आपला 6 वा सामना जिंकला. या सामन्यानंतर ऑरेंज आणि पर्पल कॅपसाठीही चुरस आणखी वाढली आहे. आरसीबीचा वेगवान गोलंदाज भुवनेश्वर कुमार याने पर्पल कॅपच्या शर्यतीत पहिलं स्थान पटकावलं आहे. भुवीकडे सध्या पर्पल कॅप आहे.
भुवनेश्वर कुमार याने दिल्ली कॅपिट्ल्स विरुद्ध एकूण 3 विकेट्स मिळवल्या. भुवीने दिल्ली विरुद्ध त्याच्या कोट्यातील 4 पैकी 3 ओव्हर बॉलिंग केली. भुवीने या 3 ओव्हरमध्ये अवघ्या 5 धावा दिल्या. भुवीने यासह पर्पल कॅप पटकावली. भुवीच्या नावावर 8 सामन्यानंतर 14 विकेट्स आहेत. भुवीने या दरम्यान 7.61 च्या इकॉनमीने धावा दिल्या ज्या सध्याच्या फटकेबाजीच्या तुलनेत फारच कमी आहे.
सारखे विकेट्स तरीही भुवीला पर्पल कॅप कशी?
पर्पल कॅपच्या शर्यतीत अंशुल कंबोज दुसऱ्या स्थानी आहे. अंशुल यानेही 8 सामन्यांत भुवनेश्वरप्रमाणे 14 विकेट्स मिळवल्या आहेत. मात्र भुवीच्या तुलनेत त्याचा इकॉनमी रेट जास्त आहे. त्यामुळे भुवीला पर्पल कॅप देण्यात आली. तर एशान मलिंगा यानेही 8 सामन्यांत 14 विकेट्स घेतल्या आहेत. मात्र एशानचा इकॉनमी रेट हा 9.44 असा आहे.
ऑरेंज कॅप कुणाच्या डोक्यावर?
सनरायजर्स हैदराबादचा ओपनर अभिषेक शर्मा याच्या डोक्यावर ऑरेंज कॅप आहे. अभिषेकने 8 सामन्यांत 380 धावा केल्या आहेत. अभिषेकने या दरम्यान 3 अर्धशतकं आणि 1 शतक झळकावलं आहे. अभिषेकनंतर या यादीत दिल्ली कॅपिट्ल्सचा केएल राहुल दुसऱ्या स्थानी विराजमान आहे. केएलने एकूण 358 धावा केल्या आहेत. केएलकडे आरसीबी विरुद्ध 23 धावा करुन अभिषेकला पछाडण्याची संधी होती. मात्र केएल 1 धावेवर आऊट झाला. त्यामुळे केएलची संधी हुकली.
विराटचं टॉप 5 मध्ये कमबॅक
राजस्थान रॉयल्सचा 15 वर्षीय फलंदाज वैभव सूर्यवंशी तिसऱ्या स्थानी आहे. वैभवने 8 सामन्यांत 357 धावा केल्यात. विराट कोहली याने दिल्ली विरुद्ध नाबाद 23 धावा केल्या. विराटची यासह सर्वाधिक धावा करणाऱ्या पहिल्या 5 फलंदाजांमध्ये कमबॅक झालं आहे. विराटच्या नावावर 8 सामन्यांनंतर 351 धावा आहेत. विराट चौथ्या स्थानी आहे. तर हेन्रिक क्लासेन 8 सामन्यानंतर 349 धावांसह पाचव्या क्रमांकावर आहे.
