SRH vs MI : यूसुफ पठाण हार्दिक पंड्यावर संतापला, सोशल मीडियावर सुनावले खडेबोल

आयपीएलच्या 17 व्या मोसमात मुंबई इंडियन्सची निराशानजक सुरुवात झालीय. मुंबईला हार्दिक पंड्या याच्या नेतृत्वात सलग दुसऱ्या पराभवाचा सामना करावा लागला. मुंबई विरुद्ध हैदराबाद यांच्यात बुधवारी 27 मार्च रोजी सामना पार पडला. हैदराबादने मुंबईवर 31 धावांनी मात केली. मुंबईने विजयासाठी मिळालेल्या 278 धावांचा पाठलाग करताना 246 धावांपर्यंत मजल मारली. त्याआधी मुंबईने टॉस जिंकून हैदराबादला बॅटिंगसाठी भाग पाडलं. हैदराबादच्या फलंदाजांनी मुंबईची बॉलिंग फोडून काढली. जसप्रीत बुमराह या एकमेव गोलंदाजाने टिच्चून मारा करत फक्त 9 च्या इकॉनॉमी रेटने धावा दिल्या. मात्र कॅप्टन हार्दिकने पहिल्या 11 ओव्हरपैकी 1 ओव्हरच बुमराहला दिली. याच मुद्द्यावरुन सोशल मीडियावर टीम इंडियाचा माजी ऑलराउंडर यूसुफ पठाण याने हार्दिकला खडेबोल सुनावले आहेत.

युसूफ पठाण याने एक्स (ट्विटर) पोस्ट करत हार्दिकच्या कर्णधारपदाबाबत प्रश्नचिन्ह उपस्थित केले आहेत. तसेच हार्दिकच्या निकृष्ठ नेतृत्वामुळेच हैदराबादला 250 पेक्षा अधिक धावा करता आल्या, असंही यूसुफने म्हटलंय. एकूणच काय तर यूसुफने हार्दिकची चांगलीच शाळा घेतलीय. तसेच हार्दिकच्या न पटलेल्या निर्णयाबाबतही त्याने आश्चर्य व्यक्त केलंय. यूसुफने त्याच्या एक्स पोस्टमध्ये नक्की काय म्हटलंय ते जाणून घेऊयात.

यूसुफच्या ट्विटमध्ये काय?

“हैदराबादने 11 ओव्हरमध्ये 160 पेक्षा अधिक धावा केल्या. आतापर्यंत बुमराहला फक्त 1 ओव्हरच का दिली? तुमच्या सर्वोत्तम गोलंदाजाला ओव्हर द्यायला पाहिजे. मला वाटतं हार्दिकची ही वाईट कॅप्टन्सी आहे”, असं म्हणत यूसुफने आपला संताप व्यक्त केला. यूसुफने हे ट्विट हैदराबादच्या बॅटिंग दरम्यान केलं.

यूसुफचा हार्दिकवर राग

हार्दिकवर नेटकऱ्यानंतर माजी क्रिकेटपटूंचा संताप

दरम्यान हार्दिकवर मुंबईच्या चाहत्यांनी सोशल मीडियावरुन नाराजी व्यक्त केलीच आहे. हार्दिकला नेटकऱ्यांच्या टीकेचा सामना करावा लागतोय. अशात हैदराबाद विरुद्ध झालेल्या सामन्यानंतर हार्दिकवर माजी क्रिकेटपटूंचा टीकेची झोड उठली आहे.