T20 WC 2026 : वेस्ट इंडिजनंतर इंग्लंडचा संघ सुपर 8 फेरीत, इटलीची झुंज अपयशी; स्कॉटलंडच्या आशा संपुष्टात
टी20 वर्ल्डकप 2026 स्पर्धेतील 29व्या सामन्यात इंग्लंड आणि इटली हे संघ आमनेसामने आले होते. या सामन्यात इंग्लंडने विजय मिळवला आणि सुपर 8 फेरीतील स्थान पक्क केलं आहे. त्यामुळे क गटातील चित्र स्पष्ट झालं आहे.
टी20 वर्ल्डकप 2026 स्पर्धेत इंग्लंडने इटलीचा धावांनी धुव्वा उडवला. नाणेफेकीचा कौल इंग्लंडच्या बाजूने लागला आणि प्रथम फलंदाजी स्वीकारली. इंग्लंडने प्रथम फलंदाजी करताना 20 षटकात 7 गडी गमवून 202 धावा केल्या. तसेच इटलीसमोर विजयासाठी 203 धावांचं लक्ष्य ठेवलं. हे आव्हान काही इटलीला गाठता आलं नाही. इटलीचा संघ 178 धावांवर मजल मारू शकला. हा सामना इंग्लंडने 24 धावांनी जिंकला. इटलीचा संघ पराभूत झाला पण इंग्लंडचा चांगलाच घाम काढला. शेवटच्या षटकात 6 चेंडूत 25 धावा अशी स्थिती आणली होती. 24 चेंडूत 64 धावांवरून ही स्थिती येथपर्यंत आणली होती. यावरून हा सामना काही इटलीने सहज दिला नाही. या विजयासह इंग्लंडने सुपर 8 फेरीत जागा पक्की केली आहे.
टी20 वर्ल्डकप 2026 स्पर्धेत इटली विरुद्धच्या सामन्यात इंग्लंडची सुरूवात काही चांगली झाली नव्हती. सुरूवातील झटपट विकेट पडल्याने दडपण वाढलं होतं. अवघ्या 105 धावांवर निम्मा संघ तंबूत होता. त्यामुळे 150 ते 160 धावा करेल असं वाटलं होतं. पण मधल्या फळीत आलेल्या विल जॅक्सने सामन्याचं चित्र बदललं. त्याच्या आक्रमक खेळीमुळे इंग्लंडला 202 धावांपर्यंत मजल मारता आली. त्याने 22 चेंडूत 4 षटकार आणि 3 चौकार मारत नाबाद 53 धावांची खेळी केली. त्याच्या खेळीमुळे इंग्लंडला हा विजय सोपा झाला. नाही तर इटलीनेही दम काढला असता. इटलीकडून बेन मॅनेंटी याने 25 चेंडूत 60 धावांची खेळी केली. त्याचा आक्रमक बाणा पाहून इंग्लंडला घाम फुटला होता. त्याने 6 षटकार आणि 4 चौकार मारले होते. त्याची विकेट पडली आणि सामना इंग्लंडच्या पारड्यात झुकला.
इंग्लंडने वेस्ट इंडिजनंतर सुपर 8 फेरीत जागा मिळवणारा दुसरा संघ ठरला आहे. त्यामुळे क गटाचं समीकरण संपलं आहे. या गटात वेस्ट इंडिज, इंग्लंड, स्कॉटलँड, इटली आणि नेपाळ हे संघ होते. या गटातून वेस्ट इंडिजने सुरुवातीचे तीन सामने जिंकून सुपर 8 फेरी गाठली होती. तर नेपाळचा संघ सलग पराभवानंतर स्पर्धेतून आऊट झाला होता. आता इंग्लंड इटली सामन्यानंतर या गटातून स्कॉटलँड आणि इटली हे संघ आऊट झाले आहेत. इटलीने हा सामना जिंकला असता तर स्कॉटलँड आणि इटलीच्या आशा जिवंत राहिल्या असत्या. पण या सामन्यातील निकालाने या गटाचं चित्र आता स्पष्ट झालं आहे. आता टॉपला कोण राहील याची उत्सुकता आहे. इंग्लंड की वेस्ट इंडिज यांच्यात चुरस असेल.
