Sunil Gavaskar: भर मॅचमध्ये विंडिजकडून नको ‘ते’ कृत्य, पाहताच सुनील गावस्करांना राग अनावर

IND vs WI 4th T20: हैदराबादमध्ये वेस्ट इंडिजविरुद्धच्या चौथ्या टी-२० आंतरराष्ट्रीय सामन्यादरम्यान एक अशी घटना घडली, ज्यामुळे भारतीय क्रिकेटचे दिग्गज सुनील गावस्कर प्रचंड संतापले. समालोचनादरम्यान वेस्ट इंडिजचा वेगवान गोलंदाज शमर जोसेफने जशी गोलंदाजी केली त्यावर गावस्कर भडकले. गावस्करांनी आता जोसेफवर गंभीर आरोप केले आहेत.

शमर जोसेफचा एक वेगवान शॉर्ट बॉल थेट अर्शदीप सिंगच्या खांद्यावर लागला. चेंडू लागल्यानंतर अर्शदीप वेदनेने विव्हळत असल्याचे दिसत होते, पण त्याने फलंदाजी सुरू ठेवण्याचा निर्णय घेतला. त्यावेळी भारताला सामना जिंकण्यासाठी शेवटच्या चेंडूंमध्ये जलद धावा करणे आवश्यक होते. भारतीय कर्णधार श्रेयस अय्यरने अर्शदीपला दुखापतग्रस्त होऊन निवृत्त होण्याचा सल्लाही दिला, पण त्याने क्रीजवरच थांबण्याचा निर्णय घेतला. त्यानंतरच्या चेंडूंमध्येही अर्शदीपला शॉर्ट बॉल्सचा सामना करावा लागला.

स्टंप्सवर किंवा यॉर्करवर गोलंदाजी करण्याऐवजी, शमर जोसेफने पुन्हा एक शॉर्ट बॉल टाकला, सुदैवाने जो अर्शदीप लागला नाही. यावेळी समालोचन करत असलेल्या सुनील गावस्कर यांनी जोसेफच्या वृत्तीवर प्रश्नचिन्ह उपस्थित केले. गावस्कर म्हणाले, “तो त्याला लक्ष्य करत आहे. स्टंप्स अगदी समोर असताना तो फलंदाजावर हल्ला का करत आहे?”

गावस्कर यांची ही टिप्पणी सोशल मीडियावरही चर्चेचा विषय बनली. फलंदाज स्पष्टपणे जखमी असताना त्याच्या शरीरावर सतत चेंडू फेकण्याची काय गरज असं म्हणत अनेक चाहत्यांनीही प्रश्नचिन्ह उपस्थित केले. अर्शदीप क्रीजवर जास्त वेळ टिकू शकला नाही. पाच धावा करून तो दुखापतग्रस्त होऊन रिटारयर्ड  झाला आणि मैदानाबाहेर गेला. बंगळूरुमधील निर्णायक सामन्यासाठी तो तंदुरुस्त होऊ शकला नाही, तर भारतीय संघाला हा एक मोठा धक्का ठरू शकतो.

प्रथम फलंदाजी करताना वेस्ट इंडिजने कर्णधार शाई होपच्या शानदार शतकाच्या जोरावर तीन गडी गमावून २४७ धावा केल्या. होपने अवघ्या ५० चेंडूंमध्ये नाबाद १०२ धावा करून आपल्या संघाच्या मोठ्या धावसंख्येचा पाया रचला. प्रत्युत्तरात, भारताला केवळ २२३ धावाच करता आल्या. वेस्ट इंडिजकडून कीमो पॉलने उत्कृष्ट गोलंदाजी करत ४१ धावांत पाच बळी घेतले आणि भारताचा धावांचा पाठलाग पूर्णपणे उधळून लावला. कॅरिबियन संघाने हा सामना २४ धावांनी जिंकून पाच सामन्यांची मालिका २-२ अशी बरोबरीत आणली. आता या मालिकेचा निकाल बंगळूरु येथील अंतिम सामन्यात लागेल.