कुस्तीचा आखाडा गाजवणारा पैलवान विजय चौधरी लोकसभा लढवणार, पक्ष आणि मतदारसंघ…

योगेश बोरसे, पुणे, दि. 30 नोव्हेंबर 2023 | कुस्तीच्या आखाड्यात अनेकांना चितपट करणारा पैलवान विजय चौधरी यांनी निवडणुकीच्या आखाड्यात उतरण्याची तयारी सुरु केली आहे. ट्रिपल महाराष्ट्र केसरी असलेला पैलवान विजय चौधरी यांनी आपली राजकीय महत्वकांक्षा जाहीर केली आहे. कुस्तीच्या आखाड्यानंतर आपण राजकारणाचा आखाडा गाजवण्याच्या तयारीत असल्याचे विजय चौधरी यांनी ‘टीव्ही ९ मराठी’शी बोलताना सांगितले. पैलवान विजय चौधरी यांनी आपण राजकारणात एन्ट्री करणार असल्याचे सांगताच चर्चा सुरु झाली आहे.

विजय चौधरी यांना कोणी दिली ऑफर?

विजय चौधरी यांना राजकारणात कोणत्या पक्षाकडून ऑफर आली आहे का? यावर बोलताना सांगितले की, अद्याप कुठल्याच पक्षाची आपणास ऑफर नाही. मात्र भारतीय जनता पक्ष आपला आवडता पक्ष आहे. त्या पक्षाकडून संधी मिळाल्यास आपण लोकसभा निवडणूक लढण्यास तयार आहे.

कोणता मतदार संघ निवडणार

विजय चौधरी हे जळगाव जिल्ह्यातील चाळीसगाव येथील रहिवाशी आहेत. चाळीसगाव तालुक्यातील सायगाव हे त्यांचे गाव आहे. यामुळे जळगाव लोकसभा मतदारसंघात जर संधी मिळाली तर नक्कीच निवडणूक लढवणार असल्याचे त्यांनी म्हटले आहे. जळगाव लोकसभेत सध्या भाजपचे उन्मेष पाटील खासदार आहेत. भाजप उन्मेष पाटील यांना पर्याय शोधत असल्याची चर्चा गेल्या काही दिवसांपासून आहे. यामुळे विजय चौधरी जळगाव लोकसभा मतदार संघातून लढणार असल्याचे स्पष्ट झाले आहे.

विजय चौधरी पोलीस खात्यात

विजय चौधरी यांची २०१७ मध्ये राज्य सरकारकडून पोलीस उपअधीक्षकपदी नियुक्ती करण्यात आली होती. सध्या ते पुणे पोलीस दलात कार्यरत आहे. वाहतूक शाखेचे उपअधीक्षक म्हणून ते कार्यरत आहे. आतापर्यंत आपण पोलीस खात्यात राहून जनतेची सेवा केली, आता राजकारणात येऊन जनतेची सेवा करायची आहे, असे विजय चौधरी यांनी टीव्ही ९ मराठीशी बोलताना सांगितले. जळगाव लोकसभा मतदार संघात प्रसिद्ध वकील उज्ज्वल निकम निवडणूक लढवणार असल्याची चर्चा होती. परंतु निका कोणत्या पक्षाकडून लढवणार? हे अजून समोर आले नाही.