Video : ऑनलाईन नवेकोरे शूज केले ऑर्डर, रिटर्न करताना बॉक्समध्ये भरले फाटलेले बूट, नेटकरी संतापले!
लोकांना नवे बूट ऑर्डर केले ते घेतले आणि नाही आवडले म्हणून रिटर्न केले पण रिटर्न करताना नव्या बूटाच्या जागी त्यात जुने फाटलेले बूट भरून दिले हा प्रकार समोर आल्यानंतर विक्रेत्याला लाखोंचा फटका बसला आहे.

ऑनलाईन शॉपिंग करताना ग्राहकांना कधी साबण मिळतो, कधी दगड तर कधी मागवलेल्या वस्तूऐवजी काहीतरी वेगळचं पार्सल येतं. पण उत्तर प्रदेशातील आग्रा येथे तर याच्या अगदी उलट प्रकार समोर आला आहे. लोकांना नवे बूट ऑर्डर केले ते घेतले आणि नाही आवडले म्हणून रिटर्न केले पण रिटर्न करताना नव्या बूटाच्या जागी त्यात जुने फाटलेले बूट भरून दिले. 1 ते 2 नव्हे तर तब्बल 550 बॉक्समध्ये हा प्रकार घडल्याची माहिती आहे. हा प्रकार समोर आल्यानंतर विक्रेत्याला लाखोंचा फटका बसला आहे.
550 बॉक्स उघडले अन् विक्रेत्याला धक्काच बसला
आग्रा येथील एक बूट व्यावसायिक प्लिपकार्ट या ऑनलाईन प्लॅटफॉर्मवरून आपले उत्पादन विकतो. त्याने ग्राहकांसाठी अगदी नवे बूट पॅक करून पाठवले होते. मात्र काही ऑर्डर रद्द झाल्यानंतर जेव्हा हे बॉक्स उघडण्यात आले, तेव्हा आतलं दृश्य पाहून पायाखाली जमीनच सरकली. बॉक्समध्ये नवे बूट असण्याऐवजी जुने, खराब झालेले आणि फाटलेले बूट ठेवण्यात आले होते. अशा प्रकारचे तब्बल 550 बॉक्स मिळाल्याचा दावा करण्यात आला आहे. त्यामुळे विक्रेत्याचं मोठं आर्थिक नुकसान झालं आहे.
सोशल मीडियावर व्हिडिओ व्हायरल
एका सोशल मीडिया यूजरने हा व्हिडिओ सोशल मीडियावर शेअर केला आहे. या व्हिडिओमध्ये अनेक बूटांचे बॉक्स उघडलेले दिसतात. त्यामध्ये नवीन बूटांऐवजी जुने आणि वापरून खराब झालेले बूट ठेवलेले असल्याचं दिसतं आहे. हा व्हिडिओ समोर आल्यानंतर ऑनलाईन व्यवहार आणि रिटर्न पॉलिसीवर प्रश्न उपस्थित होऊ लागले. काही वापरकर्त्यांनी डिलिव्हरी प्रक्रियेत सहभागी असलेल्या कर्मचाऱ्यांची मिलीभगत असण्याची शक्यता व्यक्त केली आहे. मात्र अधिकृत माहिती समोर आलेली नाही.
प्लिपकार्टनेही घेतली दखल
या घटनेवर प्लिपकार्टच्या अधिकृत सपोर्ट अकाऊंटने प्रतिक्रिया दिली आहे. कंपनीने विक्रेत्याला या प्रकरणाची सविस्तर माहिती आणि आवश्यक तपशील थेट पाठवण्यास सांगितलं आहे. कंपनीने मदत करण्याची तयारी दर्शवली आहे.