आनंदाची बातमी, गुढीपाडव्याच्या दिवशी सोन्याच्या भावात मोठी घसरण, ग्राहकांची सकाळपासून खरेदीसाठी गर्दी, तब्बल…
सोने खरेदी करणाऱ्यांसाठी आनंदाची बातमी आहे. गुढीपाडव्याच्या दिवशी सोन्याच्या किंमतीमध्ये मोठी घसरण झाली आहे. किंमत पाहून ग्राहक सोने खरेदीसाठी गर्दी करत आहेत.
जागतिक पातळीवर सुरू असलेल्या अमेरिका–इस्रायल आणि इराणमधील तणावामुळे आर्थिक अस्थिरता मोठ्या प्रमाणात वाढली आहे. या पार्श्वभूमीवर आंतरराष्ट्रीय व्यापारातील अनिश्चिततेचा परिणाम थेट मौल्यवान धातूंवर दिसून येत असून, सोने आणि चांदीच्या दरात सतत चढ-उतार होत आहेत.
अशातच गुढीपाडव्याच्या पार्श्वभूमीवर भारतीय बाजारात सोन्याच्या दरात लक्षणीय घसरण झाल्याचे दिसून आले आहे. साडेतीन मुहूर्तांपैकी एक मानल्या जाणाऱ्या गुढीपाडव्याच्या दिवशी सोने खरेदी करणे अत्यंत शुभ मानले जाते. त्यामुळे या काळात ग्राहकांचा सोन्याकडे मोठा कल असतो.
यंदा मात्र सणाच्या तोंडावरच सोन्याचे दर घसरल्याने ग्राहकांसाठी ही एक दिलासादायक बाब ठरली आहे. आज 19 मार्च 2026 रोजी भारतीय बाजारात सोन्याच्या दरात बदल नोंदवला गेला. 10 ग्रॅम 24 कॅरेट सोन्याचा दर सुमारे 1,57,750 रुपये आहे. तर 22 कॅरेट सोन्याचा दर 10 ग्रॅमसाठी 1,44,600 रुपये इतका आहे.
मुंबईतही हेच दर पाहायला मिळत असून, स्थानिक कर, उत्पादन शुल्क आणि दागिन्यांच्या मेकिंग चार्जमुळे शहरानुसार किंमतीत थोडाफार फरक असू शकतो.
गुढीपाडव्याच्या पार्श्वभूमीवर सोन्याच्या दरातील घसरण ही खरेदीसाठी अनुकूल संधी मानली जात असून ग्राहकांनी खरेदीपूर्वी दर आणि शुद्धता याची खात्री करून घेणे आवश्यक आहे.
