बॉसने ओव्हरटाईम सांगितल्यावर या Gen Z कर्मचाऱ्याने दिलं सडेतोड उत्तर; व्हिडिओ पाहून लोक म्हणाले, ‘व्वा!’
'वर्क-लाईफ बॅलन्स' या विषयावर एका 'Gen Z' कर्मचाऱ्याचा व्हिडिओ सोशल मीडियावर प्रचंड व्हायरल झाला आहे. या व्हिडिओमध्ये ती बॉसला 'ओव्हरटाईम' करण्यास नकार देते
आजच्या कॉर्पोरेट जगात ‘वर्क-लाईफ बॅलन्स’ हा विषय खूप चर्चेत आहे. जिथे जुन्या पिढीतील लोक जास्त तास काम करण्यालाच कामाप्रती असलेली निष्ठा मानतात, तिथे ‘Gen Z’ पिढी मात्र याला थेट विरोध करत आहे. याचेच एक उत्तम उदाहरण देणारा एक व्हिडिओ सध्या सोशल मीडियावर खूप व्हायरल होत आहे. या व्हिडिओमध्ये एका तरुण कर्मचाऱ्याने आपल्या बॉसला कामाच्या वेळेबद्दल असं काही उत्तर दिलं आहे की, त्याचे लाखो चाहते झाले आहेत.
हा व्हिडिओ शताक्षी पांडे नावाच्या एका अकाउंटवरून इंस्टाग्रामवर पोस्ट करण्यात आला आहे. व्हिडिओमध्ये शताक्षी ऑफिसमधून निघताना दिसत आहे. त्यावेळी तिचे बॉस तिला म्हणतात, “शताक्षी पांडे, थोडं थांबून अजून काम कर.” त्यावर शताक्षी शांतपणे, पण ठामपणे उत्तर देते, “सर, आज मला वेळेवर घरी जायचं आहे. माझं काम पूर्ण झालं आहे.” तिचा बॉस तिला समजावण्याचा प्रयत्न करतो की, तो स्वतः काल रात्रीपासून ट्रेनमध्ये होता आणि सकाळी साडेसातपासून ऑफिसमध्ये आहे. तरीही शताक्षी आपल्या मतावर ठाम राहते आणि कामापेक्षा वैयक्तिक आयुष्याला महत्त्व देते.
हा व्हिडिओ आतापर्यंत २२ लाखांहून अधिक लोकांनी पाहिला आहे आणि यावर हजारो कमेंट्स आल्या आहेत. लोक शताक्षीच्या या विचाराचे कौतुक करत आहेत. एका युजरने लिहिले, “जुन्या पिढीसाठी ओव्हरटाईम करणं सामान्य होतं, पण नवीन पिढीला वेळेचं आणि मानसिक आरोग्याचं महत्त्व कळलं आहे.” दुसऱ्या एका युजरने मजाकिया अंदाजात लिहिले, “Gen Z: काम संपलं, मी घरी… बॉस: ही कोणत्या काळातली मुलं आहेत?”
तज्ज्ञांच्या मते, ‘Gen Z’ पिढी त्यांच्या कामाच्या वेळेबद्दल आणि वैयक्तिक आयुष्याबद्दल खूप जागरूक आहे. त्यांना फक्त जास्त पगारासाठी आपलं मानसिक आणि शारीरिक आरोग्य धोक्यात घालायचं नाही. म्हणूनच, ते आवश्यक असल्याशिवाय ओव्हरटाईम किंवा सुट्टीच्या दिवशी काम करणं टाळतात. त्यांना असं वाटतं की, चांगल्या कामासाठी योग्य विश्रांती आणि वैयक्तिक वेळ मिळणं खूप महत्त्वाचं आहे.
हा व्हिडिओ फक्त एक गंमत म्हणून व्हायरल झाला नाही, तर तो एका मोठ्या बदलाचं प्रतीक आहे. आजची तरुण पिढी कामाच्या ठिकाणी आपल्या हक्कांसाठी बोलायला घाबरत नाही आणि आपल्या आयुष्याच्या प्रत्येक पैलूला महत्त्व देते. हे बदल कॉर्पोरेट जगासाठी नक्कीच एक नवीन दिशा देणारे आहेत.
