UPSC सिव्हिल सेवा परीक्षा 2025 चा अंतिम निकाल जाहीर; अनुज अग्निहोत्री देशात प्रथम

UPSC CSE Final Result 2025 Declared : संघ लोकसेवा आयोग (UPSC) ने आज शुक्रवारी सिव्हिल सेवा परीक्षा 2025 चा अंतिम निकाल जाहीर केला आहे. या प्रतिष्ठित परीक्षेत अनुज अग्निहोत्री यांनी देशात प्रथम क्रमांक मिळवला आहे. त्यांच्या पाठोपाठ राजेश्वरी सुवे एम यांनी दुसरा, तर आकांक्षा धूल यांनी तिसरा क्रमांक मिळवला आहे.

या वर्षी एकूण 958 पदांसाठी उमेदवारांची निवड करण्यात आली असून त्यापैकी 180 उमेदवारांची निवड Indian Administrative Service (IAS) साठी झाली आहे.

टॉप 10 मध्ये कोण?

UPSC सिव्हिल सेवा परीक्षेच्या टॉप 10 मध्ये अनुज अग्निहोत्री, राजेश्वरी सुवे एम आणि आकांश धुल यांच्यासह राघव झुनझुनवाला, ईशान भटनागर, जीनिया अरोड़ा, ए आर राजा मोहद्दीन, पक्षल सेक्रेटरी, आस्था जैन आणि उज्जवल प्रियांक यांचा समावेश आहे.

सिव्हिल सेवा परीक्षेची प्राथमिक परीक्षा 25 मे 2025 रोजी घेण्यात आली होती. त्यानंतर मुख्य परीक्षा 22 ऑगस्ट ते 31 ऑगस्ट 2025 या कालावधीत झाली. अंतिम टप्पा असलेला पर्सनॅलिटी टेस्ट किंवा मुलाखत 5 जानेवारी 2026 पासून सुरू झाला होता आणि 27 फेब्रुवारी 2026 रोजी ही प्रक्रिया पूर्ण झाली.

मुख्य परीक्षेनंतर एकूण 2,736 उमेदवारांना मुलाखतीसाठी बोलावण्यात आले होते. अंतिम निकाल जाहीर झाल्यानंतर पुढील 15 दिवसांत सर्व उमेदवारांचे गुण UPSC च्या अधिकृत संकेतस्थळावर अपलोड केले जाणार आहेत.

विविध सेवांसाठी निवड

UPSC कडून देण्यात आलेल्या माहितीनुसार, या वर्षी एकूण 958 पदांवर भरती करण्यात आली आहे. त्यापैकी 180 उमेदवारभारतीय प्रशासनिक सेवा (IAS) साठी, 55 उमेदवार भारतीय विदेश सेवा (IFS) साठी आणि 150 उमेदवार भारतीय पुलिस सेवा (IPS) साठी निवडले गेले आहेत.

IAS च्या 180 पदांपैकी 74 पदे अनारक्षित (General) प्रवर्गासाठी आहेत. तर 28 पदे अनुसूचित जाती (SC), 13 पदे अनुसूचित जमाती (ST), 47 पदे इतर मागासवर्गीय (OBC) आणि 18 पदे आर्थिकदृष्ट्या दुर्बल घटक (EWS) प्रवर्गासाठी राखीव ठेवण्यात आली आहेत. दरवर्षीप्रमाणेच UPSC सिव्हिल सेवा परीक्षा देशातील सर्वात प्रतिष्ठित आणि कठीण परीक्षांपैकी एक मानली जाते. या परीक्षेत यश मिळवण्यासाठी लाखो उमेदवार प्रयत्न करत असतात.