Personal Loan | या कामासाठी कधीच घेऊ नका वैयक्तिक कर्ज, व्याज भरतानाच होईल दमछाक

या कामासाठी नको कर्ज

Image Credit source: सोशल मीडिया

Personal Loan News| सध्या दिवसभरात कमीत कमी दोन फोन तर वैयक्तिक कर्ज (Personal Loan), वाहन कर्ज (Vehicle Loan), गृहकर्ज (Home Loan) वा क्रेडिट कार्ड (Credit Card) विषयी नक्कीच असतात. आता तुम्हाला वाटेल की, एकीकडे कर्ज देण्यासाठी अर्थसंस्था आणि बँका (Bank) तयार असताना आणि कुठलंही तारण (security Amount) मागत नसताना मग ही संधी कशाला सोडायची? अशाच विचारात अनेक जण वैयक्तिक कर्ज घेतात. कमी कागदपत्रांची पुर्तता करावी लागते आणि अगदी थोड्याच वेळात कर्जाची रक्कम खात्यात जमा होत असल्याने अनेक जण या आमिषाला बळी पडतात. पण गरज नसताना फक्त चैन खातर घेतलेले हे कर्ज फास ठरते. हप्ते फेडण्यात आणि मोठ्या व्याजामुळे तुमच्याकडून अव्वाच्या सव्वा रुपये वसूल केल्यानंतर पश्चातापाशिवाय वा मनस्तापाशिवाय काहीच शिल्लक राहत नाही. तेव्हा या ऑफर्सला (Offers) बळी पडण्यापूर्वी तुमची गरज काय नी तुमच्याकडे पैशांची आवक कशी राहिल याचाही विचार करा.नाहीतर भूर्दंड तर बसेलच पण मनस्ताप सहन करावा लागेल तो वेगळाच

वैयक्तिक कर्ज असूरक्षित वर्गात

आवश्यक सर्व कामांसाठी आपण बँकेकडून कर्ज घेतो. गाडी घ्यायची असेल तर कार लोन, घर घ्यायचं असेल तर गृहकर्ज, अभ्यास करायचा असेल तर एज्युकेशन लोन खरेदी करावं लागतं. याशिवाय बँका पर्सनल लोन (Personal Loan) देतात. हे एक अतिशय असुरक्षित कर्ज आहे. बाकीच्या कर्जापेक्षा वैयक्तिक कर्जही खूप महाग आहे. म्हणजेच हे कर्ज जास्त व्याजदराने मिळतं. सध्या पर्सनल लोनचा व्याजदर 20 टक्क्यांपेक्षा जास्त आहे. त्यामुळे काही कामासाठी पर्सनल लोन न घेण्याचा सल्ला अनेक तज्ज्ञ देतात.

सिबिल स्कओर हवा चांगला

पर्सनल लोन घेण्यासाठीही तुम्हाला बँकेतून फोन येतील. यामध्ये तुम्हाला प्री-अप्रूव्ह्ड लोन ऑफर केलं जातं. त्यासाठी सुरक्षितता म्हणून सोने, घर किंवा गाडी आदी गहाण ठेवण्याची गरज पडत नाही. जर तुमचा सिबिल स्कोअर चांगला असेल तर तुम्हाला हे कर्ज सहज मिळतं. याच कारणामुळे अनेक जण वैयक्तिक कर्ज घेतात. हे कर्ज सहज उपलब्ध होत असल्याने अनेक जण हा पर्याय निवडतात.

डाऊन पेमेंटसाठी नका घेऊ कर्ज

अनेकदा मालमत्ता खरेदी करताना डाउन पेमेंट करण्यासाठी लोक वैयक्तिक कर्ज घेतात. तज्ज्ञ हा प्रकार टाळण्याचा सल्ला देतात. मालमत्ता खरेदीच्या गरजेनुसार वैयक्तिक कर्जांना फीचर्स मिळत नाहीत. त्याचबरोबर त्याचा व्याजदरही बऱ्यापैकी चढा असतो. वैयक्तिक कर्ज खूप महाग असतात. त्यामुळे अशा कामासाठी कर्ज काढू नका.

कर्जाच्या जाळ्यात अडकू शकता

अनेक वेळा क्रेडिट कार्डचं बिल भरण्यासाठी बरेच जण पर्सनल लोन घेतात. पण हा पर्याय ही चुकीचा आहे. व्याजदर महाग असल्याने तुम्हाला क्रेडिट कार्ड भरण्यासाठी वैयक्तिक कर्ज घेणे नुकसानदायक ठरतं. विशेष म्हणजे एकदाही हप्ता चुकवला तर बोजा वाढू शकतो. त्याचबरोबर तुमची सिबिलही खराब होईल. तुम्ही कर्जाच्या जाळ्यातही अडकू शकता.

कर्ज काढून मौज नकोच

छंद पूर्ण करण्यासाठी कधीही वैयक्तिक कर्ज घेऊ नये. महागडे मोबाइल आणि महागड्या ठिकाणांना भेट देण्यासाठी कधीही वैयक्तिक कर्ज घेऊ नका. तसेच वैयक्तिक कर्ज घेऊन शेअर बाजारात पैसे गुंतवू नका. गृहकर्ज किंवा कार लोन घेतलं तर तुमच्याकडे भांडवल असतं. जे विकून तुम्ही कर्जाची परतफेड करू शकता. समजा तुम्ही पर्सनल लोन घेऊन कुठेतरी फिरायला गेलात आणि नंतर तुम्हाला ते फेडताना त्रास होऊ शकतो. त्यामुळे अशा परिस्थितीत तुम्ही कर्जाच्या सापळ्यात वाईट प्रकारे अडकू शकता.