उद्धव ठाकरे यांच्या खेडमधील सभेबाबत शिवसेनेच्या नेत्यानं स्पष्टच सांगितलं, “… काही परिणाम होणार नाही”

अमरावती : उद्धव ठाकरे यांची उद्या रत्नागिरीतील खेडमध्ये जाहीर सभा होणार आहे. या सभेकरता मुस्लिमांनी उपस्थित राहावे असे आवाहन मराठी मुस्लीम सेवा संघाचे अध्यक्ष फकीर ठाकूर यांनी केले आहे. यासंदर्भात कृषी मंत्री अब्दुल सत्तार यांनी अमरावतीमध्ये उद्धव ठाकरे यांच्यावर जोरदार निशाणा साधला आहे. कुणी बोलले म्हणून मुस्लिम समाज त्यांच्या पाठीशी राहत नाही. सर्व समाजाला न्याय देण्याचे काम मुख्यमंत्री एकनाथ शिंदे करत आहे. यावेळी उद्धव ठाकरे यांच्या सभेचा मुस्लिम समाजावर कोणताही परिणाम होणार नसल्याचेही त्यांनी सांगितले. तर मुस्लिम समाज हा एकनाथ शिंदे यांच्या पाठीशी असल्याचेही अब्दुल सत्तार यांनी यावेळी म्हटले आहे. यामुळे आता उद्या होणाऱ्या उद्धव ठाकरे यांच्या सभेत ते काय बोलतील कुणावर नेमकी टीका करतील, याकडे साऱ्यांचे लक्ष लागले आहे.