हिंजवडीतील आयटी कर्मचाऱ्यांच्या मोर्चात आदित्य ठाकरे सहभागी, पायाभूत सुविधांसाठी मागणी

पुण्यातील हिंजवडी येथे आयटी कर्मचाऱ्यांनी पायाभूत सुविधांच्या मागणीसाठी एक महत्त्वाचा मोर्चा काढला आहे. सध्या युवासेना प्रमुख आदित्य ठाकरे या मोर्च्यात सहभागी झाल्याचे वृत्त आहे. हिंजवडी, मान, मारुंजी आणि म्हाळुंगे परिसरातील स्थानिक नागरिकही या आंदोलनात मोठ्या संख्येने सहभागी झाले आहेत.

इन्फोसिस सर्कल, हिंजवडी फेज-१ येथून या मोर्च्याची सुरुवात झाली असून, तो सध्या वर्तुळाकार मार्गाने पुढे जात आहे. आयटी कर्मचाऱ्यांसाठी आवश्यक असलेल्या चांगल्या पायाभूत सुविधांच्या अभावाचा मुद्दा यानिमित्ताने उपस्थित करण्यात आला आहे. गेल्या काही दिवसांपासून या परिसरातील रस्त्यांवरील खड्ड्यांचा प्रश्न चर्चेचा विषय बनला होता. या खड्ड्यांमुळे नागरिकांना आणि कर्मचाऱ्यांना मोठ्या अडचणींचा सामना करावा लागत होता, ज्यावर यापूर्वीही अनेक आंदोलने झाली आहेत. या पार्श्वभूमीवर आदित्य ठाकरे यांनी यापूर्वीच हिंजवडी परिसराची पाहणी केली होती. आता ते स्वतः आयटी कर्मचाऱ्यांच्या आणि स्थानिक रहिवाशांच्या या आंदोलनात सहभागी झाल्याने या मागणीला अधिक बळ मिळाले आहे. सार्वजनिक सोयीसुविधांचा अभाव आणि त्यातून निर्माण होणाऱ्या समस्यांवर प्रशासनाने त्वरित लक्ष द्यावे, अशी मागणी मोर्चेकऱ्यांनी केली आहे.