महिला शक्तीचा एल्गार! दारू विक्री होणाऱ्या ठिकाणी तोडफोड अन् राडा

अकोला शहरालगतच्या गुडधी गावात अवैध दारू विक्रीविरोधात महिलांनी आक्रमक पवित्रा घेत जोरदार आंदोलन केले. गावात बेकायदा दारू विक्री बंद व्हावी, यासाठी यापूर्वी अनेकदा मागणी करण्यात आली होती. परंतु, प्रशासन आणि पोलिसांकडून कोणतीही कारवाई न झाल्याने संतप्त झालेल्या महिलांनी स्वतः पुढाकार घेतला. गावातील महिलांनी एकत्र येऊन दारू विक्री होणाऱ्या घरांवर छापा टाकला आणि तिथला दारूचा साठा उद्ध्वस्त केला.

यापूर्वी, गुडधी गावातील महिलांनी अवैध दारू विक्रीविरोधात पोलिसांकडे वारंवार तक्रारी केल्या होत्या, परंतु पोलिसांनी याकडे दुर्लक्ष केले. यामुळे चिडलेल्या महिलांनी आज दारू विक्रीच्या ठिकाणी असलेले टीन शेड आणि हातगाड्यांची तोडफोड केली. गावातील दारूच्या गुत्त्यावर महिलांनी प्रचंड गोंधळ घातला, ज्यामुळे दारू विक्रेत्यांची चांगलीच धांदल उडाली.