Amravati MLC Election 2026 Result: प्रत्यक्ष मतमोजणी सुरू होण्यापूर्वीच… अमरावती शिक्षक मतदारसंघाच्या मतमोजणी प्रक्रियेत काय घडतंय?

अमरावती शिक्षक मतदारसंघासाठी झालेल्या विधानपरिषद निवडणुकीच्या मतमोजणी प्रक्रियेला सध्या वेग आला आहे. सध्या मतमोजणी केंद्रावर मतपत्रिकांचे गट तयार करण्याचे काम सुरू आहे. सुरुवातीला २५-२५ मतपत्रिकांचे गठ्ठे तयार करण्यात आले असून, या प्रक्रियेची पाचवी फेरी सुरू आहे. एकूण सहा फेऱ्या पूर्ण झाल्यानंतर प्रत्यक्षात मतांची मोजणी सुरू होईल. या निवडणुकीमध्ये एकूण ३३,००० मतदारांनी आपला हक्क बजावला होता. प्रत्यक्ष मतमोजणी सुरू होण्यापूर्वीच या सर्व ३३,००० मतपत्रिकांची तपासणी केली जाईल.

निवडणुकीत महायुती आणि महाविकास आघाडी यांच्यात थेट लढत पाहायला मिळाली. महायुतीमध्ये मोठ्या प्रमाणावर बंडखोरी झाल्याचे चित्र होते, ज्यामुळे या बंडखोरीचा निकालावर काय परिणाम होतो, याकडे राजकीय वर्तुळाचे लक्ष लागले आहे. निकालाची उत्सुकता पाचही जिल्ह्यांमध्ये असून, मतमोजणी केंद्राबाहेर शिक्षकांची मोठी गर्दी जमली आहे. दुपारी एक वाजताच्या सुमारास प्रत्यक्ष मतमोजणीला सुरुवात होण्याची शक्यता आहे.