Ashok Kharat | रुपाली चाकणकरांच्या बहिणीला पोलिसांची नोटीस, नेमकं कारण काय?

राज्यभर गाजत असलेल्या भोंदू अशोक खरात प्रकरणात नवनवीन धक्कादायक माहिती समोर येत आहे. एका पीडित महिलेच्या तक्रारीवरून पोलिसांनी खरात याच्याविरोधात अत्याचाराचा गुन्हा दाखल करून त्याला अटक केली होती. त्यानंतर महिला अत्याचार आणि फसवणुकीचे अनेक गुन्हे उघडकीस आले असून प्रकरणाचा तपास करण्यासाठी एसआयटीची नियुक्ती करण्यात आली आहे. दरम्यान, या प्रकरणात आता नवे वळण आले असून रुपाली चाकणकर यांच्या बहिणी प्रतिभा चाकणकर यांच्या अडचणीत वाढ झाली आहे. शिर्डी पोलिसांनी त्यांना नोटीस बजावली असून जबाब नोंदवण्यासाठी पाच दिवसांत हजर राहण्याचे आदेश दिले आहेत. तपासादरम्यान समता पतसंस्थेतील अनेक खात्यांमध्ये संशयास्पद व्यवहार झाल्याचे समोर आले आहे. वेगवेगळ्या व्यक्तींच्या नावावर असलेल्या खात्यांचे नॉमिनी म्हणून अशोक खरातचे नाव असल्याचे आढळले असून या खात्यांतून कोट्यवधी रुपयांचे व्यवहार झाल्याची माहिती आहे. प्रतिभा चाकणकर आणि त्यांच्या मुलाच्या नावावरही चार खाती असल्याचे निष्पन्न झाले आहे. आतापर्यंत 33 खातेदारांचे जबाब नोंदवण्यात आले असून इतरांची चौकशी सुरू आहे. या प्रकरणात काही राजकीय व्यक्तींशी संबंधित फोटो समोर आल्याने राजकीय वर्तुळातही खळबळ उडाली आहे.