बदलापूर लैंगिक अत्याचार प्रकरणातील सहआरोपी तुषार आपटे भाजपचा स्वीकृत नगरसेवक; तीव्र संतापानंतर राजीनामा

बदलापूर येथील अल्पवयीन मुलीवरील लैंगिक अत्याचार प्रकरणात सहआरोपी असलेल्या तुषार आपटे यांना भाजपने स्वीकृत नगरसेवक पद दिल्याने महाराष्ट्रात मोठी खळबळ उडाली होती. या निर्णयामुळे चौफेर टीकेची झोड उठली आणि तीव्र जनसंताप व्यक्त झाला. त्यानंतर भारतीय जनता पक्षावर नामुष्कीची वेळ ओढवली. अखेर, भाजपने हा निर्णय रद्द करत तुषार आपटे यांना स्वीकृत नगरसेवक पदाचा राजीनामा देण्याचे निर्देश दिले. या घटनेवर भाजपच्या अनेक नेत्यांनी माहिती नसल्याचे सांगितले,

तर दुसरीकडे विरोधकांनी भाजपला चांगलेच घेरले. हा प्रकार राज्याच्या प्रतिमेला काळिमा फासणारा असल्याची टीका विरोधकांनी केली. दोन वर्षांपूर्वी झालेल्या या प्रकरणात आधी पोलिसांनी तक्रार घेण्यास टाळाटाळ केली होती आणि शाळेतील सीसीटीव्ही फुटेजही गायब झाले होते. मुख्य आरोपी अक्षय शिंदे पोलीस एन्काऊंटरमध्ये मारला गेला होता, तर तुषार आपटे जामिनावर बाहेर होते. स्वीकृत नगरसेवक पदाच्या निवडीनंतर बदलापुरात तुषार आपटेचे भव्य बॅनर लावण्यात आले होते, ज्यावर शुभेच्छा देणाऱ्यांमध्ये आदित्य घोरपडे, सोहम आपटे, अनुश्री आपटे आणि इतरांचा समावेश होता. जनक्षोभानंतर तुषार आपटे यांनी पक्षाची आणि शाळेची बदनामी टाळण्यासाठी स्वेच्छेने राजीनामा देत असल्याचे म्हटले.