भोरमध्ये भातशेती संकटात; पावसाअभावी जमिनीला भेगा, हातातोंडाशी आलेलं पीक करपलं

पुण्याच्या भोर तालुक्यामध्ये गेल्या काही दिवसांपासून पावसाने दडी मारल्यामुळे भात शेती गंभीर संकटात सापडली आहे. पावसाअभावी अनेक भागांतील भात खाचरातील जमिनीला मोठमोठ्या भेगा पडल्या असून, उभी पिके सुकायला लागली आहेत. भात शेती पूर्णपणे पावसाच्या पाण्यावर अवलंबून असल्याने पाण्याची तीव्र टंचाई जाणवत आहे, ज्यामुळे पिके वाया जाण्याच्या मार्गावर आहेत.

भोर तालुका हा पुणे जिल्ह्यात भाताचे आगर म्हणून ओळखला जातो. येथे पिकवला जाणारा इंद्रायणी भात त्याच्या उत्कृष्ट प्रतीसाठी संपूर्ण महाराष्ट्रात प्रसिद्ध आहे. मात्र, सध्याची परिस्थिती पाहता, पावसाच्या दीर्घकाळच्या अनुपस्थितीमुळे या प्रसिद्ध भातशेतीवर मोठे संकट ओढवले आहे. पिकांच्या संरक्षणासाठी आणि शेतकऱ्यांच्या उदरनिर्वाहासाठी तातडीने पावसाची आवश्यकता आहे. या परिस्थितीवर टीव्ही ९ मराठीने प्रकाश टाकला आहे.