Bihar Election Results 2025 : भाजप मोठा, नंबर 1 चा पक्ष असला तरी नितीश कुमार CM होते अन् राहणार, JDU चा दाव्यानं चर्चांना उधाण

बिहार विधानसभा निवडणुकीचे निकाल आता समोर आले असून, राष्ट्रीय लोकशाही आघाडीने (NDA) पुन्हा एकदा बिहारमध्ये सत्ता राखली आहे. या निकालांमुळे राज्यात एनडीए सरकार स्थापन होणार हे स्पष्ट झाले आहे. भारतीय जनता पक्ष (भाजप) सर्वात मोठा पक्ष म्हणून उदयास आला असला तरी, संयुक्त जनता दलाने (जेडीयू) मुख्यमंत्रीपदावर नितीश कुमार यांचाच दावा केला आहे.

जेडीयूच्या मते, नितीश कुमार मुख्यमंत्री होते आणि तेच राहणार. जेडीयूने १०१ जागा लढवल्या होत्या, त्यापैकी ८१ जागांवर ते सध्या आघाडीवर आहेत. तर, भाजपने ९० जागांवर आघाडी घेतली आहे. महाआघाडीचा मात्र मोठा पराभव झाला असून, त्यांना ५० जागांच्या आतच समाधान मानावे लागले आहे. पंतप्रधान नरेंद्र मोदींच्या करिष्म्यामुळे बिहारमध्ये एनडीएला यश मिळाल्याचे दिसून येत आहे. संध्याकाळी पंतप्रधान मोदी भाजप मुख्यालयात कार्यकर्त्यांना संबोधित करणार आहेत. काँग्रेसची कामगिरी अत्यंत खराब झाली असून, त्यांनी लढवलेल्या ६१ जागांपैकी केवळ चार जागांवर ते आघाडीवर आहेत.