राहुल गांधी यांच्या फ्लाईंग किसच्या वादात हेमा मालिनी यांची उडी; म्हणाल्या, ‘मी राहुल गांधी यांना…’

नवी दिल्ली, १० ऑगस्ट २०२३ | भाजप नेत्या आणि केंद्रीय मंत्री स्मृती ईराणी यांनी काँग्रेस नेते राहुल गांधी यांच्यावर गंभीर आरोप केला आहे. राहुल गांधी यांनी लोकसभेच्या आवारात फ्लाईंग किस दिल्याचा आरोप भाजप नेत्या स्मृती ईराणी यांनी केला आहे. हा स्त्रियांचा अपमान असून राहुल गांधी यांच्यावर कारवाई करण्याची मागणी स्मृती ईराणी यांनी केली आहे. या आरोपामुळे राहुल गांधी यांच्या कथित फ्लाईंग किसवरून नवा वाद निर्माण झाला आहे. या वादात भाजपच्या खासदार हेमा मालिनी यांनी देखील उडी घेतल्याचे समोर आले आहे. फ्लाईंग किसच्या वादावर भाजपच्या खासदार हेमा मालिनी यांनी प्रतिक्रिया देताना असे म्हटले की, मी राहुल गांधी यांना फ्लाईंग किस देताना पाहिलं नाही. पण काही शब्द होते, ते योग्य नव्हते. विशेष म्हणजे या तक्रार पत्रावर हेमा मालिनी यांनी सही केली आहे. दरम्यान, भाजपच्या 22 महिला खासदारांनी लोकसभा अध्यक्षांना भेटून राहुल गांधी यांची तक्रारही केली आहे. त्यामुळे राहुल गांधी यांच्यावर कारवाई होते का? याकडे सर्वांचं लक्ष लागलं आहे.