Pune : भाजप पदाधिकाऱ्याकडून महिला पोलीस अधिकाऱ्याचा विनयभंग, पक्षाकडून अ‍ॅक्शन अन्…

पुण्यातील भाजप पदाधिकाऱ्याकडून महिला पोलीस अधिकाऱ्याचं गैरवर्तन केल्याचे समोर आले आहे. विनयभंग केल्याप्रकरणी भाजपच्या प्रमोद कोंढरे यांच्यावर गुन्हा दाखल करण्यात आला आहे. भाजपच्या प्रमोद कोंढरे यांच्यावर महिला पोलीस अधिकाऱ्यावर विनयभंग केल्याचा आरोप आहे. मिळालेल्या माहितीनुसार, केंद्रीय मंत्री नितीन गडकरी यांच्या नियोजित पुणे दौऱ्याच्यावेळी हा सर्व प्रकार घडला. सोमवारी एका कार्यक्रमाच्या निमित्ताने नितीन गडकरी पुण्यात येणार होते. भाजपचे नेते शनिवार वाड्याजवळ जमले होते. त्यावेळी भाजपचे कसबा पेठचे आमदार हेमंत रासने हे कार्यकर्त्यांना आणि बंदोबस्तासाठी असलेल्या पोलिसांना एका दुकानात चहा पिण्यासाठी घेऊन गेले. त्यावेळी प्रमोद कोंढरे यांनी गर्दीचा फायदा घेत बंदोबस्ताला असलेल्या महिला पोलीस निरिक्षकाला चुकीच्या पद्धतीने स्पर्श केला असल्याचा आरोप आहे. हा सगळा प्रकार सीसीटीव्ही कॅमेऱ्यात कैद झाला आहे.