दुष्काळाची झळ! छत्रपती संभाजीनगरातील 150 वीटभट्ट्या बंद, हजारो मजुरांवर उपासमारीची वेळ

छत्रपती संभाजीनगर जिल्ह्यात दुष्काळाच्या तीव्र झळांमुळे वीटभट्टी व्यवसाय पूर्णपणे ठप्प झाला आहे. पावसाअभावी पाणी उपलब्ध नसल्याने वीटभट्टी मालकांना माती मिळत नाही आणि यामुळे सुमारे १५० वीटभट्ट्या बंद पडल्या आहेत. या व्यवसायावर अवलंबून असलेल्या २५,००० हून अधिक मजुरांवर आता उपासमारीची वेळ आली आहे. वीटभट्टी मालकांच्या मते, ५०,००० रुपये वार्षिक रॉयल्टी आणि पाण्याचा अभाव यामुळे व्यवसाय चालवणे परवडणारे नाही. अनेक वर्षांपासून हा व्यवसाय करणाऱ्या मालकांना अशी बिकट परिस्थिती यापूर्वी कधीही अनुभवली नव्हती.

दुसरीकडे, मजुरांच्या हाताला काम नसल्याने त्यांना कुटुंबाचे पोट भरणे अवघड झाले आहे. कामगार कल्याण कार्डसारख्या योजनांचा लाभ घेण्यासाठीही पैसे मागितले जात असल्याची तक्रार मजूर करत आहेत. शासनाने त्वरित रॉयल्टी माफ करावी आणि मालक व मजुरांना आर्थिक मदत द्यावी, अशी मागणी वीटभट्टी व्यावसायिक आणि मजुरांकडून केली जात आहे. अन्यथा, यावर्षी हा व्यवसाय सुरू होणे शक्य नसल्याचे चित्र आहे.