Mumbai Local Update : मुंबईकरांचा खोळंबा, कांजूरमार्गजवळ ओव्हरहेड वायरवर कपडा पडला; लोकल 30 ते 45 मिनिटे उशिराने

मुंबईकरांसाठी एक महत्त्वाची बातमी समोर आली आहे. मध्य रेल्वेवरील वाहतूक व्यवस्था आज विस्कळीत झाली आहे. कांजूरमार्ग स्थानकाजवळ ओव्हरहेड वायरवर कपडा पडल्याने मोठा तांत्रिक बिघाड झाल्याची माहिती मिळाली आहे. या अनपेक्षित घटनेमुळे रेल्वे सेवांवर परिणाम झाला असून, प्रवाशांना अडचणींचा सामना करावा लागत आहे.

मिळालेल्या माहितीनुसार, मुंबईकडे येणाऱ्या फास्ट ट्रॅकवरील लोकलच्या लांबच लांब रांगा लागल्या आहेत. कामावर जाणाऱ्या आणि येणाऱ्या चाकरमान्यांना यामुळे मोठा मनस्ताप सहन करावा लागत आहे. सध्या मध्य रेल्वेवर साधारण अर्धा ते पाऊण तास उशिरानं वाहतूक सुरू आहे. तांत्रिक बिघाड दुरुस्त करण्याचे काम युद्धपातळीवर सुरू असल्याचे रेल्वे प्रशासनाकडून सांगण्यात आले आहे. हा बिघाड लवकरात लवकर दूर करून रेल्वे सेवा पूर्वपदावर आणण्याचा प्रयत्न सुरू आहे, जेणेकरून मुंबईकरांना वेळेत त्यांच्या गंतव्यस्थानी पोहोचता येईल.