Devendra Fadnavis : काँग्रेसने बाबासाहेबांचं संविधान पायाखाली तुडवलं; फडणवीसांचा काँग्रेसवर निशाणा

महाराष्ट्राचे मुख्यमंत्री देवेंद्र फडणवीस यांनी काँग्रेस पक्षावर भारतीय संविधानाचा अनादर केल्याचा आणि डॉ. बाबासाहेब आंबेडकरांनी दिलेल्या मूलभूत हक्कांवर गदा आणल्याचा गंभीर आरोप केला आहे. काँग्रेसने संविधानात बदल करून सर्वोच्च न्यायालयाला मूलभूत हक्कांवर निर्णय घेण्यापासून रोखले, असे फडणवीस म्हणाले.

फडणवीसांच्या मते, बाबासाहेब आंबेडकरांनी टाटा, बिर्ला असो किंवा गल्लीतील सामान्य माणूस, सर्वांना समान अधिकार दिले होते. मात्र, काँग्रेसने पंतप्रधान पदाला संविधानापेक्षा वरचढ ठरवण्याचे काम केले. १९७६ साली ४२ व्या घटनादुरुस्तीद्वारे काँग्रेसने मूलभूत अधिकार गोठवले आणि नागरिकांना सर्वोच्च किंवा उच्च न्यायालयात दाद मागण्याचा अधिकार काढून घेतला, असा दावा फडणवीसांनी केला.

डॉ. आंबेडकरांनी प्रत्येक नागरिकाला जगण्याचा, रोजगाराचा, धर्माचा आणि अभिव्यक्तीचा अधिकार दिला, तसेच या हक्कांचे हनन झाल्यास थेट न्यायालयामध्ये जाण्याची मुभा दिली होती. मात्र, काँग्रेसने हेच अधिकार हिरावून घेण्याचा प्रयत्न केला. मोरारजी देसाई आणि अटलबिहारी वाजपेयी यांच्या सरकारने १९७७ मध्ये पुन्हा संविधानात दुरुस्ती करून हे अधिकार सामान्य माणसाला बहाल केले, असे फडणवीस यांनी सांगितले. काँग्रेसचे हे मनसुबे जुने असून ते संविधान विरोधी आहेत, असा हल्लाबोल फडणवीसांनी यावेळी केला.