Sanjay Ghadi On BJP : दिया मिर्झाच्या दिवाळी व्हिडीओवरून मुंबई महापालिकेत भाजप-शिवसेनेत मतभेद

मुंबई महानगरपालिकेने अभिनेत्री दिया मिर्झाचा दिवाळी प्रदूषण जनजागृती संदेश देणारा व्हिडीओ आपल्या समाजमाध्यमांवरील खात्यावरून हटवल्याने राजकीय वर्तुळात नवा वाद उफाळला आहे. या प्रकरणावरून मुंबई महापालिकेत भारतीय जनता पक्ष (भाजप) आणि शिवसेना यांच्यात तीव्र मतभेद निर्माण झाले आहेत. शिवसेनेचे नेते संजय घाडी यांनी भाजप आणि विशेषतः आमदार अमित साटम यांच्यावर टीका केली आहे.

उच्च न्यायालयाच्या निर्देशानुसार, प्रदूषण टाळण्यासाठी नागरिकांनी फटाके कमी फोडावेत, असे आवाहन अनेक कलाकारांनी केले आहे. या मोहिमेअंतर्गत माधुरी दीक्षित आणि अजिंक्य रहाणे यांनीही नागरिकांना आवाहन केले होते. दिया मिर्झाच्या व्हिडीओमध्ये “दिवाळी आवाजाची नाही, आनंदाची” असे म्हटले होते, ज्यात कोणताही गैर संदेश नव्हता, असे घाडींचे म्हणणे आहे.

आमदार अमित साटम यांनी याला “शहाणपण शिकवू नका” असे म्हणत विरोध केल्याचे समोर आले आहे. मात्र, घाडी यांनी हे केवळ एक चांगले आवाहन असून, याला धार्मिक तेढ देण्याचा प्रयत्न करू नये, असे स्पष्ट केले. त्यांनी महानगरपालिकेने हटवलेला हा व्हिडीओ त्वरित पुन्हा प्रसारित करण्याची मागणी केली आहे.