दोन्ही राष्ट्रवादी विलिनीकरणाबाबत CM देवेंद्र फडणवीस नेमकं काय म्हणाले?

राष्ट्रवादी काँग्रेसच्या दोन्ही गटांच्या संभाव्य विलिनीकरणाच्या चर्चांवर मुख्यमंत्री देवेंद्र फडणवीस यांनी महत्त्वपूर्ण भाष्य केले आहे. “हे दोन स्वतंत्र पक्ष असून, त्यांचे निर्णय ते स्वतः घेतील. यावर आम्ही काही बोलणे योग्य नाही,” असे फडणवीस म्हणाले. असा कोणताही निर्णय घेण्यापूर्वी किंवा चर्चा झाल्यास युतीचा एक मोठा घटक म्हणून आम्हाला नक्कीच सल्लामसलत केली जाईल, असेही त्यांनी नमूद केले.

गोकुळसारख्या सहकारी संस्थांमधील कथित वैधानिक पेचाबाबत सरकारची भूमिका स्पष्ट करताना, फडणवीस यांनी सांगितले की, सरकार केवळ वैधानिक जबाबदारी पार पाडत आहे. यात कोणताही राजकीय हेतू नाही किंवा संस्थेवर कब्जा करण्याचा मानस नाही. कोरम पूर्ण न झाल्यामुळे उद्भवणाऱ्या परिस्थितीवर सरकारला वैधानिकदृष्ट्या लक्ष घालावे लागते. तसेच, शिवसेनेला विश्वासात न घेतल्याच्या आरोपांवरही त्यांनी स्पष्टीकरण दिले. कोणताही निर्णय मंत्रिमंडळाने घेतला असून, स्थानिक नेत्यांशी आणि कायदेशीर विभागाशी चर्चा करूनच तो प्रस्ताव पुढे आला होता, असे फडणवीस यांनी सांगितले. काँग्रेस पक्ष सहकारी संस्थांच्या निवडणुकांनाही राष्ट्रीय मुद्दा बनवत असल्याची टीकाही त्यांनी केली.