सयाजी शिंदे संतापले! ‘झाडामध्ये देव आहे, त्याला विकणार का?’ म्हणत वृक्षतोडीला विरोध

अभिनेते सयाजी शिंदे यांनी पर्यावरण आणि भूमी संरक्षणासाठी आक्रमक भूमिका घेतली आहे. तोरण येथील वृक्षतोडीच्या पाहणीनंतर ग्रामस्थांशी संवाद साधताना त्यांनी झाडामध्ये देव आहे, त्याला विकणार का? असा सवाल उपस्थित करत निसर्गाचे महत्त्व पटवून दिले. आपला ४० वर्षांचा वैयक्तिक अनुभव सांगताना, शिंदे यांनी धरणात गेलेल्या जमिनीचा हक्क मिळवण्यासाठी किती संघर्ष करावा लागला, यावर प्रकाश टाकला.

कागदपत्रांमध्ये जमीन मिळाली असली तरी प्रत्यक्षात ती उपलब्ध नव्हती आणि अतिक्रमणाने ग्रस्त होती, असे त्यांनी सांगितले. जमिनीचे दलाल आणि भ्रष्ट अधिकाऱ्यांमुळे सामान्य लोकांचे कसे नुकसान होते, हे त्यांनी स्पष्ट केले. जंगल तोडल्यास संपूर्ण सृष्टी नष्ट होईल, अशी भीती व्यक्त करत, त्यांनी जल, जंगल, जमीन यांच्या रक्षणाची जबाबदारी सर्वांची असल्याचे म्हटले. विनाशकारी प्रकल्पांविरुद्ध एकत्र येऊन लढा देण्याचे आवाहन त्यांनी ग्रामस्थांना केले. त्यांनी लोकांच्या जमिनी बळकावून दलालांच्या माध्यमातून कवडीमोल भावाने विकल्या जात असल्याचा आरोप करत, सावध राहण्याचा सल्ला दिला.