निवडणुका 2024 मध्ये झाल्या आणि ज्ञानेश कुमार 2025 मध्ये पदावर आले, मग… CM फडणवीसांनी समीकरणच मांडलं

मुख्यमंत्री देवेंद्र फडणवीस यांनी ठाकरे बंधूंनी काढलेल्या मोर्चावर सडकून टीका केली आहे. ‘हा मोर्चा म्हणजे हरवलेली जमीन शोधण्याचा प्रयत्न होता,’ असे फडणवीस म्हणाले. इतका गवगवा करूनही मोर्चाला फारसे लोक नव्हते, याकडे त्यांनी लक्ष वेधले. जनतेने नाकारल्यामुळे आपली नाराजी निवडणूक आयोगावर काढत असल्याचा आरोप त्यांनी केला. ठाकरे बंधू महाराष्ट्राच्या निवडणुकीत गडबड झाली आणि त्यामुळे ज्ञानेश कुमारांना हटवा असे सातत्याने म्हणत आहेत, यावर फडणवीसांनी तीव्र आक्षेप घेतला. त्यांनी स्पष्ट केले की, ज्ञानेश कुमार हे २०२५ मध्ये मुख्य निवडणूक आयुक्त झाले, तर महाराष्ट्राच्या निवडणुका २०२४ मध्ये झाल्या आणि एसआर २०२६ मध्ये झाला. त्यामुळे २०२६ मधल्या एसआर आणि २०२५ मध्ये नियुक्त झालेले मुख्य निवडणूक आयुक्त २०२४ च्या निवडणुकांवर कसा परिणाम करू शकतात, असा सवाल फडणवीसांनी केला. लोकांकडून नाकारल्यामुळे हे लोक निवडणूक आयोगावर फ्रस्ट्रेशन काढत आहेत, असेही त्यांनी म्हटले. महाराष्ट्राच्या राजकारणात सध्या ठाकरे गट आणि भाजप यांच्यात तीव्र राजकीय संघर्ष सुरू आहे, त्या पार्श्वभूमीवर ही टीका महत्त्वाची ठरते.