डिजीसीएकडून खासगी विमान कंपन्यांसाठी नियम जाहीर, सुरक्षेसाठी कोणते निर्णय?
डीजीसीएने खासगी आणि चार्टर्ड विमान कंपन्यांसाठी नवीन कठोर सुरक्षा नियम जाहीर केले आहेत. झिरो टॉलरन्स धोरणांतर्गत व्यावसायिक हितांपेक्षा सुरक्षेला अधिक महत्त्व दिले जाईल. सुरक्षेमुळे उड्डाण रद्द करण्याचा किंवा विलंब करण्याचा वैमानिकांचा निर्णय अंतिम मानला जाईल. कंपन्यांना सेवा सुरक्षा रँकिंग दिली जाईल आणि पारदर्शकतेसाठी विमान देखभाल, पायलट अनुभव याची माहिती वेबसाइटवर प्रकाशित करावी लागेल.
डीजीसीएने (Directorate General of Civil Aviation) देशातील खासगी आणि चार्टर्ड विमान कंपन्यांसाठी नवीन कठोर सुरक्षा नियम लागू केले आहेत. या नियमांनुसार, झिरो टॉलरन्स धोरण जाहीर करण्यात आले असून, यापुढे व्यावसायिक हितांपेक्षा प्रवासी सुरक्षेला सर्वाधिक प्राधान्य दिले जाईल. सुरक्षा कारणांमुळे एखादे उड्डाण रद्द करण्याचा किंवा त्यात विलंब करण्याचा वैमानिकांचा निर्णय अंतिम मानला जाईल, असे स्पष्ट करण्यात आले आहे. चार्टर्ड किंवा व्हीआयपी उड्डाणांपेक्षा प्रवाशांची सुरक्षा अधिक महत्त्वाची आहे, यावर या नव्या नियमांमध्ये भर देण्यात आला आहे.
सर्व नॉन-शेड्यूल्ड ऑपरेटर परवानाधारक (NSOP) कंपन्यांना सेफ्टी रँकिंग दिली जाईल, ज्यामुळे त्यांच्या सेवा किती सुरक्षित आहेत, हे स्पष्ट होईल. पारदर्शकतेसाठी प्रत्येक कंपनीला त्यांच्या विमानांच्या देखभालीचा इतिहास आणि वैमानिकांच्या अनुभवाची माहिती वेबसाइटवर प्रकाशित करणे बंधनकारक असेल. कॉकपीट व्हॉईस रेकॉर्डर, इंधन डेटा आणि एडीएस-बी (ADS-B) डेटाची सखोल तपासणी केली जाईल. नियमभंगाच्या बाबतीत, आता कंपनीच्या वरिष्ठ व्यवस्थापनालाही जबाबदार धरले जाईल. तसेच, रियल-टाइम हवामान अपडेट मिळणारी यंत्रणा अनिवार्य करण्यात आली आहे.
