Eknath Shinde : तक्रारींचा पाढा वाचणारा, रडणारा हा एकनाथ शिंदे नाही, तर… शाहांच्या भेटीनंतर नेमकं काय म्हणाले?

उपमुख्यमंत्री एकनाथ शिंदे यांनी नुकतीच केंद्रीय गृहमंत्री अमित शहा यांची भेट घेऊन बिहार विधानसभा निवडणुकीतील एनडीएच्या दैदिप्यमान विजयाबद्दल त्यांचे अभिनंदन केले. बिहारमधील एनडीएची एकजूट विजयाचे मुख्य कारण असल्याचे त्यांनी नमूद केले. महाराष्ट्रातील महायुतीत मतभेद असल्याच्या चर्चा त्यांनी फेटाळून लावल्या. “मी तक्रारीचा पाढा वाचणारा एकनाथ शिंदे नाही, रडणारा नाही लढणारा आहे,” असे ते म्हणाले. स्थानिक स्वराज्य संस्था किंवा नगरपालिकांचे प्रश्न राष्ट्रीय पातळीवर आणण्याचा विषयच नसतो असे त्यांनी स्पष्ट केले.

शिंदे यांनी सांगितले की, मुख्यमंत्र्यांबरोबर झालेल्या चर्चेत महायुतीला कोठेही गालबोट लागणार नाही आणि मतभेद होणार नाहीत याची काळजी प्रत्येक पक्षाने घ्यावी असे ठरले आहे. महायुती मजबुतीने निवडणुकांना सामोरी जात असून विधानसभा निवडणुकांप्रमाणेच स्थानिक स्वराज्य संस्था आणि महानगरपालिकांमध्येही चांगले यश मिळेल असा विश्वास त्यांनी व्यक्त केला. ओबीसी आरक्षणाचा मुद्दा न्यायप्रविष्ट असल्याने त्यावर जास्त बोलणे त्यांनी टाळले. तसेच ठाण्यात शिवसेना भाजपसोबत एकत्र लढणार असल्याचेही त्यांनी स्पष्ट केले.