रवींद्र चव्हाणांशी चर्चेनंतर शिंदेंची आक्रमक देहबोली! नेमकं काय घडलं?

डोंबिवलीतील एका क्रीडा संकुलाच्या भूमिपूजन कार्यक्रमादरम्यान उपमुख्यमंत्री एकनाथ शिंदे, खासदार श्रीकांत शिंदे आणि आमदार रवींद्र चव्हाण एकाच व्यासपीठावर एकत्र आले. फोडाफोडीच्या वादानंतर पहिल्यांदाच हे नेते एकत्र आले होते, त्यामुळे त्यांच्यातील संवाद राजकीय वर्तुळात चर्चेचा विषय ठरला आहे. रवींद्र चव्हाण बोलत असताना उपमुख्यमंत्री एकनाथ शिंदे यांची देहबोली आक्रमक दिसून आली, ज्यामुळे चव्हाणांच्या चेहऱ्यावरील भाव काहीसे बदलल्याचे पाहायला मिळाले.

कार्यक्रमादरम्यान, डोंबिवलीसाठी मिळालेल्या निधीवरून रवींद्र चव्हाण आणि श्रीकांत शिंदे यांच्यात शाब्दिक चकमक उडाली. देवेंद्र फडणवीस मुख्यमंत्री झाल्यावर डोंबिवलीला निधी मिळाला, असे चव्हाण यांनी म्हटले. तर, एकनाथ शिंदे मुख्यमंत्री झाल्यानंतर कल्याण-डोंबिवलीमध्ये मोठ्या प्रमाणावर निधी यायला सुरुवात झाली, असे श्रीकांत शिंदे यांनी स्पष्ट केले. त्यांनी पंतप्रधान नरेंद्र मोदी आणि देवेंद्र फडणवीस यांच्या काळातील एमएमआरडीए निधीचा संदर्भ देत, आता शिंदे यांच्या नेतृत्वाखाली विकासकामे वेगाने सुरू असल्याचे सांगितले.