Maharashtra Election 2026 : NCP च्या मराठी उमेदवाराचा आयोगानं धर्मच बदलला, EVM वर शेखर वाकोडेंचं नाव शेख…

टिटवाळा येथील प्रभाग क्रमांक तीनमध्ये BMC निवडणूक 2026 च्या मतदान प्रक्रियेदरम्यान EVM (इलेक्ट्रॉनिक मतदान यंत्र) वर उमेदवाराच्या नावासंदर्भात मोठा गोंधळ झाल्याचे समोर आले आहे. निवडणूक अधिकाऱ्यांच्या भोंगळ कारभाराला या गोंधळासाठी जबाबदार धरण्यात येत आहे. शरद पवार गटाचे उमेदवार शेखर अप्पाराव वाकोडे यांचे नाव EVM वर चुकीने शेख अप्पाराव वाकोडे असे नमूद करण्यात आले आहे. या गंभीर चुकीमुळे मतदारांची दिशाभूल होत असल्याचा आरोप केला जात आहे.

या प्रभागात भाजप, उद्धव सेना, वंचित बहुजन आघाडी आणि काँग्रेस या प्रमुख पक्षांचे उमेदवारही रिंगणात आहेत. या नामसाधर्म्याच्या चुकीमुळे उमेदवार आणि त्यांच्या समर्थकांमध्ये तीव्र नाराजी पसरली आहे. उमेदवार शेखर वाकोडे यांनी यावर आक्रमक भूमिका घेतली असून, निवडणूक प्रक्रिया तात्काळ थांबवण्याची मागणी केली आहे. तसेच, या प्रकरणी कायदेशीर लढा देण्याचा इशाराही त्यांनी दिला आहे. निवडणूक आयोगाच्या या चुकीमुळे लोकशाही प्रक्रियेच्या पावित्र्यावर प्रश्नचिन्ह निर्माण झाले आहे.