Chhatrapati Sambhajinagar | छत्रपती संभाजीनगरात फडणवीस-उद्धव ठाकरे एकाचवेळी! मराठवाडा मुक्तीसंग्राम दिनाच्या पार्श्वभूमीवर राजकीय चर्चांना उधाण

मराठवाडा मुक्ती संग्राम दिनाच्या पार्श्वभूमीवर मुख्यमंत्री देवेंद्र फडणवीस आणि शिवसेना (उद्धव बाळासाहेब ठाकरे) पक्षप्रमुख उद्धव ठाकरे हे दोन्ही प्रमुख नेते एकाच वेळी छत्रपती संभाजीनगर शहरात उपस्थित आहेत. या समोरासमोरच्या उपस्थितीमुळे शहरातील राजकीय वर्तुळात अनेक चर्चांना उधाण आले आहे.

उद्धव ठाकरे यांनी काल रात्रीच शहरातील हुतात्मा स्मारकाला अभिवादन केले आहे. तसेच, आज दुपारी १२ वाजता विभागीय आयुक्त कार्यालयासमोर मराठवाड्यातील विविध प्रश्नांवर ते आंदोलन करणार आहेत. हा दौरा मराठवाड्यातील जनतेच्या समस्यांवर प्रकाश टाकण्यासाठी असल्याचे मानले जात आहे.

दुसरीकडे, मुख्यमंत्री देवेंद्र फडणवीस हे देखील छत्रपती संभाजीनगरमध्ये दाखल झाले आहेत. आज सकाळी सिद्धार्थ गार्डन येथे ते ध्वजारोहण करतील आणि त्यानंतर हुतात्मा स्मारकाला अभिवादन करणार आहेत. राज्याच्या महत्त्वाच्या दिवसाच्या सोहळ्यासाठी मुख्यमंत्री स्वतः उपस्थित राहिल्याने या दौऱ्याला विशेष महत्त्व प्राप्त झाले आहे.