Arjun Khotkar : CCI केंद्रावरील कर्मचाऱ्याला अर्जुन खोतकरांनी झापलं, शेतकऱ्यांना इंग्रजीत आलेला msg…

अर्जुन खोतकर यांनी एका सीसीआय केंद्रावरील कर्मचाऱ्याला शेतकऱ्यांच्या अडचणींवरून चांगलेच झापले. रात्री उशिरा शेतकऱ्यांना इंग्रजीमध्ये आलेल्या मेसेजमुळे, पिक खरेदी रद्द झाल्याचे त्यांना समजले नाही. परिणामी, शेतमाल वाहतुकीसाठी आणलेल्या ट्रॅक्टरचे भाडे त्यांना विनाकारण भरावे लागले, यावर खोतकरांनी तीव्र संताप व्यक्त केला. खोतकर यांनी कर्मचाऱ्याला थेट विचारले की, शेतकऱ्यांना इंग्रजी कळते का? हेड ऑफिसमधून व्यवहार रद्द झाला असेल, तर त्याचे ट्रॅक्टरचे भाडे सीसीआयने भरावे अशी त्यांची मागणी होती. रात्री १२ वाजता इंग्रजीमध्ये रद्द झाल्याचा संदेश आल्यामुळे शेतकऱ्यांना मनस्ताप झाल्याचे त्यांनी सांगितले. त्यांनी कर्मचाऱ्याला शेतकऱ्यांचे नुकसान होऊ नये यासाठी योग्य पद्धतीने काम करण्याचा सल्ला दिला. दरेगाव येथील ढवळे आणि कृष्णा अंकुश पडूळ या शेतकऱ्यांच्या ट्रॅक्टर भाड्याचा मुद्दा खोतकरांनी उपस्थित केला. त्यांनी सीसीआय अधिकाऱ्यांशी तात्काळ बोलून या समस्येवर तोडगा काढण्यास सांगितले. शेतकऱ्यांना त्रास दिल्यास आमदार म्हणून आपण स्वतः तिथे येऊन बसू असा इशाराही खोतकरांनी दिला.