Dattatray Bharne : कृषीमंत्र्यांच्याच गावात शेतकरी वाऱ्यावर, भिगवण बाजारात व्यापाऱ्यांचा संप, शेतकरी हवालदिल

कृषिमंत्री दत्तात्रय भरणेंच्या मतदारसंघामध्येच शेतकरी वाऱ्यावर असल्याचे चित्र समोर आले आहे. पुण्याच्या भिगवण कृषी बाजार समितीत व्यापाऱ्यांनी अचानक संप पुकारल्यामुळे शेकडो शेतकऱ्यांचा शेतमाल विक्रीविना पडून राहिला आहे. शेतमाल साठवणुकीसाठी अपुरी जागा आणि पावसापासून संरक्षणाचा अभाव ही व्यापाऱ्यांच्या संपाची प्रमुख कारणे आहेत. या संपाचा फटका दौंड, इंदापूर, बारामती, कर्जत, करमाळा या तालुक्यांमधून आलेल्या शेतकऱ्यांना बसला आहे. अनेक शेतकऱ्यांना त्यांचा शेतमाल परत घेऊन जावे लागले, ज्यामुळे त्यांचे मोठे आर्थिक नुकसान झाले.

भिगवण बाजार समिती परिसरातील एक प्रमुख बाजारपेठ असून, येथे वारंवार मागण्या करूनही दखल न घेतल्याने व्यापाऱ्यांनी हे कठोर पाऊल उचलले आहे. शेतकऱ्यांनी कृषिमंत्र्यांना या परिस्थितीत लक्ष घालून तातडीने तोडगा काढण्याची विनंती केली आहे, अन्यथा शेतकरी देशोधडीला लागतील अशी भीती व्यक्त केली आहे.