Anil Deshmukh : अनिल देशमुखांवर नागपुरात हल्ला, गाडीवर दगडफेक अन् डोक्याला गंभीर दुखापत

माजी गृहमंत्री अनिल देशमुख यांच्यावर काल हल्ला करण्यात आला. नरखेड येथील शेवटची प्रचारसभा आटोपून ते काटोलच्या दिशेला जात होते. या दरम्यान काटोल जलालखेडा मार्गावर बेलफाट्याजवळ अनिल देशमुख यांच्या गाडीवर अज्ञातांकडून दगडफेक करण्यात आल्याचा प्रकार घडला. या हल्ल्यात अनिल देशमुख यांच्या डोक्याला जबर दुखापत झाली असून त्यांच्या डोक्यातून रक्त वाहत असल्याचा व्हिडीओ समोर आला आहे. या घटनेनंतर अनिल देशमुख यांना उपचारासाठी नागपुरातील मॅक्स हॉस्पिटलमध्ये आणण्यात आलं आहे. दरम्यान, मिळालेल्या माहितीनुसार पारडसिंगाजवळील बेल फाटा या परिसरात दगडफेक करण्यात आली. गाडीच्या समोरील काचेवर दगडफेक झाल्याने गाडीच्या काचेचा चक्काचूर झाला. गाडीच्या समोरची काच फुटली. यावेळी पोलिसांकडून गाडीची तपासणी करण्यात आली. यावेळी हल्लेखोर “भाजप जिंदाबाद” आणि “अनिलबाबू मुर्दाबाद” अशा घोषणा देत होते, असे सांगितले जात आहे.