Thane Mayor Meenakshi Shinde : ठाण्याच्या माजी महापौर मीनाक्षी शिंदे यांचा शिंदे सेनेला रामराम, कारण नेमकं काय?

ठाण्याच्या माजी महापौर मीनाक्षी शिंदे यांनी एकनाथ शिंदे यांच्या नेतृत्वाखालील शिवसेनेला रामराम ठोकला आहे. काही दिवसांपूर्वी त्यांचे जवळचे आणि निष्ठावान कार्यकर्ते मानले जाणारे शिवसेना शाखाप्रमुख विक्रांत वायचळ यांची पक्षातून हकालपट्टी करण्यात आली होती. यामुळे नाराज झालेल्या मीनाक्षी शिंदे यांनी शिवसेना महिला आघाडी प्रमुख पदाचा राजीनामा दिला. विक्रांत वायचळ यांनी प्रभाग क्रमांक ३ मध्ये स्थानिक नगरसेवकाला उमेदवारी मिळावी यासाठी मोहीम सुरू केली होती. त्यांनी भूषण पाटील आणि मधुकर पावशे यांच्या उमेदवारीला विरोध केला होता. ही कृती पक्षविरोधी मानत त्यांची पक्षातून हकालपट्टी करण्यात आली. ठाण्याचा बालेकिल्ला राखण्यासाठी शिंदे गट प्रयत्न करत असताना, मीनाक्षी शिंदे यांच्यासारख्या निष्ठावान नेत्याचा राजीनामा हा पक्षासाठी धक्का मानला जात आहे. ठाण्यात ठाकरे गट आणि मनसे यांच्या संभाव्य युतीच्या चर्चांदरम्यान हा राजकीय घडामोड घडली आहे. मीनाक्षी शिंदे यांनी ही घरातली भांडणं असून, लवकरच पक्षश्रेष्ठींशी बोलून भूमिका स्पष्ट करणार असल्याचे सांगितले.