Gajanan Kirtikar : Shivsena : गजानन कीर्तिकर ठाकरेंच्या सेनेत घरवापसी करणार? स्वतःच केला मोठा खुलासा, म्हणाले…

शिवसेना नेते गजानन कीर्तिकर यांच्या ठाकरेंच्या शिवसेनेत घरवापसी करण्याच्या चर्चांना सध्या पूर्णविराम मिळाला आहे. कीर्तिकर यांनी आपण घरवापसी करणार नसून, दलबदलू नसल्याचे स्पष्ट केले आहे. पक्षप्रमुखांशी थेट संपर्क साधता येत नसल्याने आणि भेटीगाठी होत नसल्याने आपली नाराजी असल्याचे त्यांनी जाहीर केले आहे.

कीर्तिकर यांनी म्हटले आहे की, जनतेची अनेक कामे असतात आणि ती मार्गी लावण्यासाठी पक्षप्रमुखांच्या संपर्कात असणे आवश्यक असते, परंतु तो संपर्क सध्या होत नाहीये. याशिवाय, त्यांना मोठी जबाबदारी मिळाली नसल्याचीही त्यांची खंत आहे. पक्षप्रमुख आमचे जे आहेत, त्यांच्याशी संपर्क होत नाही, भेट होत नाही, फोन होत नाही, असे त्यांनी स्पष्ट केले. यापूर्वी उद्धव ठाकरे यांच्या कार्यकाळातही अशाच प्रकारची तक्रार होती, याची आठवण त्यांनी करून दिली. पक्षप्रमुखांनी वरिष्ठ पदाधिकारी, सहकारी, आमदार आणि खासदारांना थेट संपर्क साधण्याची संधी उपलब्ध करून दिली पाहिजे, असे मत त्यांनी व्यक्त केले. त्यांची ही नाराजी केवळ संपर्काच्या अभावामुळे असून, घरवापसीचा कोणताही विचार नसल्याचे त्यांनी अधोरेखित केले.