मोठी ब्रेकिंग! महायुतीसमोरचं सर्वात मोठं संकट टळलं; गोकुळ गीते यांचं बंड अखेर थंडावलं

नाशिक विधान परिषद निवडणुकीच्या पार्श्वभूमीवर महायुतीसाठी महत्त्वाची आणि दिलासादायक घडामोड समोर आली आहे. बंडखोर भूमिका घेत निवडणूक लढवण्याच्या तयारीत असलेले गोकुळ गीते यांनी अखेर माघार घेत शिवसेना शिंदे गटाचे अधिकृत उमेदवार नरेंद्र दराडे यांना पाठिंबा जाहीर केला आहे. त्यामुळे महायुतीतील अंतर्गत पेच अखेर मिटल्याचे चित्र निर्माण झाले आहे.

नाशिक विधान परिषद जागा महायुतीच्या जागावाटपात शिवसेना शिंदे गटाच्या वाट्याला गेली होती. त्यानुसार शिंदे गटाकडून नरेंद्र दराडे यांना उमेदवारी देण्यात आली. मात्र, गोकुळ गीते यांनी अपक्ष उमेदवारी अर्ज कायम ठेवल्याने महायुतीसमोर मोठे आव्हान निर्माण झाले होते. त्यांच्या भूमिकेमुळे निवडणुकीतील राजकीय समीकरणे बदलण्याची शक्यता व्यक्त केली जात होती.

दरम्यान, आज गोकुळ गीते यांचे बंधू गणेश गीते यांच्या निवासस्थानी महत्त्वाची पत्रकार परिषद पार पडली. या पत्रकार परिषदेला मंत्री गिरीश महाजन, मंत्री उदय सामंत आणि मंत्री दादा भुसे उपस्थित होते. यावेळी महायुतीच्या वरिष्ठ नेत्यांनी घेतलेल्या चर्चांना यश आल्याचे स्पष्ट झाले.

यापूर्वी गणेश गीते यांनी भाजपच्या वतीने उमेदवारी अर्ज दाखल केला होता. त्यानंतर गोकुळ गीते यांनीही अपक्ष म्हणून अर्ज भरला होता. मात्र, उमेदवारी अर्ज मागे घेण्याच्या अंतिम दिवशी गणेश गीते यांनी माघार घेतली होती. गोकुळ गीते मात्र निवडणूक लढवण्याच्या भूमिकेवर ठाम होते. त्यामुळे महायुतीमध्ये संभ्रमाचे वातावरण निर्माण झाले होते.

अखेरीस महायुतीच्या वरिष्ठ नेत्यांच्या मध्यस्थीनंतर गोकुळ गीते यांनी आपली भूमिका बदलत नरेंद्र दराडे यांना पाठिंबा जाहीर केला. तसेच निवडणुकीतून माघार घेण्याचा निर्णय घेतला. त्यामुळे नाशिक विधान परिषद निवडणुकीत महायुतीसमोरील सर्वात मोठा अडथळा दूर झाला असून, अधिकृत उमेदवार नरेंद्र दराडे यांना मोठा दिलासा मिळाला आहे.

या घडामोडीनंतर नाशिकच्या राजकारणातील चर्चांना पूर्णविराम मिळाला असून, महायुतीने अंतर्गत बंडखोरी थोपवण्यात यश मिळवल्याची प्रतिक्रिया राजकीय वर्तुळातून व्यक्त केली जात आहे.