Gyanesh Kumar Hearing Update : ज्ञानेश कुमारांना दिलासा की पुढे संकट?; सुप्रीम कोर्टाने अंतरिम कारवाई नाकारली, कारण…

मुख्य निवडणूक आयुक्त ज्ञानेश कुमार यांच्याविरोधातील याचिकेवर सुप्रीम कोर्टात सुनावणी झाली. या सुनावणीदरम्यान, कोर्टाने ज्ञानेश कुमार यांच्यावर तात्काळ अंतरिम कारवाई करण्यास स्पष्टपणे नकार दिला आहे. मात्र, या प्रकरणाची गंभीरता लक्षात घेत कोर्टाने केंद्रीय निवडणूक आयोगाला नोटीस जारी केली आहे. पुढील आठवड्यामध्ये या याचिकेवर पुन्हा सुनावणी होणार असून, त्यापूर्वी निवडणूक आयोगाला आपले म्हणणे मांडण्यास सांगितले आहे.

ज्येष्ठ वकील विकास सिंह यांनी याचिकाकर्त्यांच्या वतीने युक्तिवाद केला. ज्ञानेश कुमार एकट्याने निर्णय घेत असल्याचा आणि सह-निवडणूक आयुक्तांना विचारात घेतले जात नसल्याचा आरोप त्यांनी केला. यामुळे निवडणूक आयुक्तांची विश्वासार्हता कमी झाल्याचेही विकास सिंह यांनी म्हटले. एका वृत्तपत्रातील अहवालाचा दाखला देत, त्यात १४ पत्रांचा उल्लेख असल्याचे त्यांनी कोर्टाच्या निदर्शनास आणले.

यावर जस्टिस बागची यांनी “आम्हाला त्यांचा (निवडणूक आयोगाचा) पक्षही बघावा लागेल” अशी टिप्पणी केली. कोर्टाने स्पष्ट केले की, तात्काळ कोणताही आदेश देता येणार नाही, तर निवडणूक आयोगाची बाजू ऐकूनच पुढील निर्णय घेतला जाईल. यामुळे सध्यातरी ज्ञानेश कुमार यांना काही प्रमाणात दिलासा मिळाला आहे.