दिल्लीत इंडिया आघाडीचा एल्गार; ज्ञानेश कुमार यांच्या राजीनाम्यासाठी विरोधक पुन्हा रस्त्यावर!

राजधानी दिल्लीमध्ये आज पुन्हा एकदा इंडिया आघाडीचे मोठे आंदोलन सुरू झाले आहे. निवडणूक आयुक्त ज्ञानेश कुमार यांच्या राजीनाम्याच्या मागणीसाठी देशभरातील इंडिया आघाडीचे कार्यकर्ते दिल्लीत जमले आहेत. काँग्रेसचे प्रमुख नेते तसेच राष्ट्रवादी काँग्रेसचे खासदारही या आंदोलनात सहभागी झाले आहेत. या आंदोलनाच्या पार्श्वभूमीवर इंडिया आघाडीच्या नेत्यांनी मोठ्या प्रमाणावर घोषणाबाजी सुरू केली आहे.

ममता बॅनर्जी घटनास्थळी पोहोचल्या असून, राहुल गांधी यांनी पत्रकार परिषद घेऊन ज्ञानेश कुमार यांच्यासह सरकारवर जोरदार हल्लाबोल केला आहे. राहुल गांधींनी यापूर्वीच या मोर्चामध्ये सर्वांनी सहभागी होण्याचे आवाहन केले होते. या आंदोलनाचा मुख्य उद्देश ज्ञानेश कुमार यांच्या राजीनाम्याची मागणी करणे हा आहे. त्यांच्यावर लोकशाहीची हत्या केल्याचा आणि मतांची चोरी केल्याचा आरोप कार्यकर्त्यांकडून केला जात आहे. हे कार्यकर्ते सुप्रीम कोर्टाकडे मोर्चा काढण्यासाठी सज्ज झाले आहेत. कॉन्स्टिट्यूशन क्लब ऑफ इंडिया येथे इंडिया आघाडीच्या नेत्यांची बैठक सुरू असून, त्यानंतर मोर्चाला सुरुवात होईल. महाराष्ट्रातूनही अनेक कार्यकर्ते या आंदोलनासाठी दिल्लीत दाखल झाले आहेत.