US India War Practice : तोफेचा गोळीबार अन् लक्ष्याचा क्षणार्धात खात्मा! भारत-अमेरिका संयुक्त युद्धाभ्यासात भारतीय लष्कराची दमदार कामगिरी

भारत आणि अमेरिकेच्या लष्करादरम्यान सुरु असलेल्या संयुक्त युद्धाभ्यास 2024 मध्ये लाईव्ह फायरिंग प्रात्यक्षिके यशस्वीरित्या पार पडली. या सरावादरम्यान, भारतीय लष्कराच्या आर्टिलरी युनिटने M777 हॉवित्झर तोफेचा वापर करत निर्धारित लक्ष्यांवर अचूक निशाणा साधला आणि ती यशस्वीरित्या उद्ध्वस्त केली. गोळीबाराचे हे प्रात्यक्षिक कौतुकास्पद ठरले.

प्रात्यक्षिकानंतर अमेरिकन सैनिकांनी तोफ असलेल्या ठिकाणाला भेट दिली. त्यांनी भारतीय लष्कराच्या अधिकारी आणि जवानांशी थेट संवाद साधून अनुभवांची देवाणघेवाण केली. हा सराव दोन्ही देशांमधील लष्करी सहकार्य आणि समन्वय वाढवण्यासाठी महत्त्वाचा ठरला आहे.

याच काळात, राजस्थानमधील जोधपूर येथे भारत-जपानचा वीर गार्डियन 2024 नावाचा संयुक्त हवाई युद्धाभ्यासही सुरू आहे. या युद्धाभ्यासात दोन्ही देशांच्या हवाई दल प्रमुखांनी फायटर जेटमधून ऐतिहासिक उड्डाण केले. 9 सप्टेंबरपासून सुरू झालेला हा 14 दिवसांचा युद्धाभ्यास 22 सप्टेंबरपर्यंत चालणार आहे. हा सराव दोन्ही देशांच्या हवाई दलांची कार्यक्षमता आणि परस्पर समन्वय वाढवण्यासाठी उपयुक्त ठरत आहे.