Raju Shetti On Sugarcane Farmers Protest : 61 तासांच्या आंदोलनाला अखेर यश, 3900 + 100 + 200 चा फॉर्म्युला मान्य; राजू शेट्टींकडून आंदोलन मागे

गेले 61 तास सुरू असलेले स्वाभिमानी शेतकरी संघटनेचे आंदोलन अखेर स्थगित करण्यात आले आहे. किणी टोलनाक्यावर शेतकऱ्यांनी जल्लोष केला. ऊस दराचा 3900 अधिक 100 अधिक 200 असा फॉर्म्युला मान्य करण्यात आला आहे. यामुळे कोल्हापूर, सांगली आणि साताऱ्यामधील साखर कारखाने सुरू होण्याचा मार्ग मोकळा झाला आहे.

कोल्हापूर जिल्हाधिकारी कार्यालयामधील बैठकीत साखर कारखानदारांनी दिलेल्या सुधारित दराचा प्रस्ताव मान्य केल्यानंतर राजू शेट्टी यांनी आंदोलन मागे घेण्याची घोषणा केली. आंदोलनामुळे पुणे-बंगळूरु महामार्गावरील वाहतूक कोंडी निर्माण झाली होती, ती आता दूर झाली आहे.

मान्य झालेल्या फॉर्म्युल्यानुसार, पहिली उचल प्रतिटन 3900 रुपये थेट शेतकऱ्यांच्या खात्यावर जमा होईल. गळीत हंगाम पूर्ण झाल्यावर 100 रुपये अतिरिक्त मिळतील आणि साखरेला प्रतिटन 4500 रुपये दर मिळाल्यास आणखी 200 रुपये दिले जातील. साखरेच्या दरात वाढ झाल्यास, अतिरिक्त नफ्यात 70% शेतकऱ्यांचा तर 30% कारखान्यांचा हिस्सा राहील. या तोडग्यामुळे कोल्हापूर, सांगली, सातारा बंद देखील स्थगित करण्यात आला आहे.