Mahanagari Express : बॉम्ब फुटनेवाला है, पाक जिंदाबाद… त्यानं एक्स्प्रेसच्या टॉयलेटमध्ये खडूनं लिहिलं अन्… प्रवाशांना भरली धडकी

जळगाव महानगरी एक्स्प्रेसमध्ये बॉम्बची अफवा पसरल्याने प्रवाशांमध्ये आणि प्रशासनामध्ये खळबळ उडाली आहे. एका अज्ञात व्यक्तीने रेल्वेच्या शौचालयात खडूने पाकिस्तान जिंदाबाद, आयएसआय जिंदाबाद असे नारे आणि बॉम्ब फुटणे वाला है असा धमकीवजा संदेश लिहिला होता. प्रवाशांनी ही बाब त्वरित रेल्वे प्रशासनाच्या निदर्शनास आणल्यानंतर, जळगाव आणि भुसावळ येथील रेल्वे अधिकारी तसेच पोलीस प्रशासन तात्काळ अलर्ट मोडवर आले.

या घटनेनंतर तातडीने रेल्वेमध्ये कसून चौकशी मोहीम राबवण्यात आली. प्रवाशांच्या सामानाची तपासणीही सुरू करण्यात आली असून, सुरक्षा व्यवस्था वाढवण्यात आली आहे. रेल्वे प्रशासनाने नागरिकांना कोणत्याही अफवांवर विश्वास न ठेवण्याचे आवाहन केले आहे, जेणेकरून अनावश्यक भीतीचे वातावरण निर्माण होऊ नये. अशा प्रकारच्या कृत्यांमागील व्यक्तींचा शोध पोलीस घेत असून, पुढील तपास सुरू आहे.