दोन तास विद्यार्थ्यांना ताटकळत ठेवलं, अखेर परीक्षा रद्द, रोहित पवार म्हणाले…

पुण्यातील आंबेगाव बुद्रुक येथील एका परीक्षा केंद्रावर महाज्योती (महात्मा ज्योतिबा फुले संशोधन व प्रशिक्षण संस्था) च्या परीक्षेत मोठा गोंधळ पाहायला मिळाला. परीक्षा देण्यासाठी आलेल्या विद्यार्थिनींनी केंद्रावर पुरेसे संगणक उपलब्ध नसल्याचा दावा केला आहे. दोन तासांच्या गोंधळानंतर महाज्योती परीक्षा अखेर रद्द करण्यात आली. या अचानक रद्द झालेल्या परीक्षामुळे विद्यार्थ्यांमध्ये तीव्र संताप व्यक्त होत आहे.

परीक्षा केंद्रावर उपस्थित असलेल्या विद्यार्थ्यांनी सरकारला या परिस्थितीसाठी पूर्णपणे जबाबदार धरले आहे. विद्यार्थ्यांच्या म्हणण्यानुसार, ते जवळपास दोन तास परीक्षा केंद्रावर थांबले होते. त्यानंतर त्यांना परीक्षा रद्द झाल्याचे सांगण्यात आले. ही परिस्थिती केवळ गोंधळातूनच उद्भवली नसून, यामागे शासनाचा ढिसाळ कारभार जबाबदार असल्याचे विद्यार्थी आंदोलक सांगत आहेत. एमपीएससीच्या परीक्षांमध्ये होत असलेल्या घोळाप्रमाणेच या सरळसेवा परीक्षेतही गोंधळ झाल्याचे विद्यार्थ्यांचे म्हणणे आहे. सध्या विद्यार्थी न्यायाच्या मागणीसाठी आंदोलन करत आहेत. गेल्या सात दिवसांपासून त्यांच्या मागण्यांकडे सरकार दुर्लक्ष करत असताना, आता दुसऱ्या एका परीक्षेतही अशा प्रकारे गोंधळ झाल्याने विद्यार्थ्यांचा संयम सुटत आहे. ते म्हणतात की, न्याय मिळेपर्यंत ते आंदोलन सुरूच ठेवतील. या सर्व परिस्थितीसाठी मुख्यमंत्री आणि संपूर्ण सरकार जबाबदार असून, त्यांनी विद्यार्थ्यांच्या मागण्यांकडे दुर्लक्ष केल्याचा आरोपही विद्यार्थ्यांनी केला आहे.